धक्कादायक घटना! हुंड्यासाठी विवाहिते ला जिवे मारले.सासरच्या मंडळींनी दोन्ही हात बांधून, शेततळ्यात सोडले...

पुणे (प्रतिनिधी) - पुणे ग्रामीण हुंडा देणे आणि घेणे दोन्हीही कायद्याने गुन्हा आहे. त्यामुळं यावर अंकुश बसावा यासाठी शासनाने कठोर नियम देखील केले आहेत. परंतु, आजही काही ठिकाणी अनेक मुलींचा हुंड्यासाठी छळ केला जात आहे. सुनेचा हुंड्यासाठी सासरच्या लोकांकडून छळ होण्याच्या अनेक धक्कादायक घटना आजवर समोर आल्या असून, अशीच एक भयाण घटना सुसंस्कृत आणि सुशिक्षित समजल्या जाणाऱ्या पुणे जिल्ह्यातून समोर आली आहे.

पुणे जिल्हा बारामती तालुक्यात एका तरुण विवाहितेला हुंड्यासाठी दोन्ही हात बांधून, सासरच्या मंडळींनी शेततळ्यात बुडवून मारल्याचा धक्कादायक प्रकार घडलाय. तर या संतापजनक घटनेनंतर पती, सासू, नणंद व नंणदेचा पती या चौघांवर पोलिसांनी हत्या आणि हुंडा प्रतिबंधक कायद्याअंतर्गत गुन्हा नोंद केला असून, तालुक्यातील मासाळवाडी येथील चौघांनाही पोलिसांनी अटक केली आहे. तर सुरेखा भाऊसाहेब गडदरे अस मयत विवाहितेचे नाव आहे.

मिळालेल्या माहितीनुसार, लग्नात अपेक्षेप्रमाणे हुंडा मिळाला नसल्यानं सासरचे लोक सुरेखाचा शारीरिक आणि मानसिक छळ करत होते, असा आरोप आहे. बारामती तालुक्यातील वडगाव निंबाळकर पोलिसांनी याप्रकरणी पती भाऊसाहेब महादेव गडदरे, सासु ठकुबाई महादेव गडदरे नणंद आशा कोकरे व तिचा पती सोनबा कोकरे या चौघां विरोधात गुन्हा दाखल करून त्यांना अटक केली. दौंड तालुक्यातील गिरिम येथील नामदेव बबन करगळ यांनी पोलिसांकडे फिर्याद दिली. 24 डिसेंबर रोजी मासाळवाडीच्या भगवान गडदरे यांच्या शेतातील शेततळ्यात त्यांची विवाहित मुलगी सुरेखा भाऊसाहेब गडदरे हिचा मृतदेह आढळून आला. संबंधित आरोपींनी घराशेजारी असलेल्या शेततळ्यामध्ये सुरेखा हिचे दोन्ही हात बांधून तिला शेततळ्यात बुडवून मारले अशी फिर्याद तिचे वडील करगळ यांनी पोलिसांकडे दिली; त्यावरून गुन्हा दाखल करण्यात आला असून, इतक्या क्रूरपणे हुंड्यासाठी सुनेला मारणाऱ्या निर्दयी आरोपींना कडक शिक्षा करावी अशी मृत मुलीच्या कुटुंबानी मागणी केली आहे.