खंडणी व हत्याप्रकरणातील आरोपी पोलिसांच्या कोठडीतून फरार.

आमगाव (प्रतिनिधी) दहा लाखाच्या खंडणीसाठी आमगाव तालुक्यातील बनगाव येथील एका १७ वर्षाच्या मुलाचा गळा आवळून खून केल्याप्रकरणी आमगाव पोलिसांनी अटक केलेला आरोपी दुर्गाप्रसाद सुखचंद हरिणखेडे (वय २४ रा. नवेगाव खैरलांजी,मध्यप्रदेश)हा पोलीस कोठडीत होता.आज सकाळी 7.30 वाजेच्या सुमारास पोलीस स्टेशनआवारातच असलेल्या शौचालयात शौचास गेला असता सोबत असलेल्या एकट्या पोलिसाला झटका देत भिंत कुदून फरार झाल्याचे वृत्त समोर आले आहे.याप्रकारामुळे मृतकाच्या कुटुंबातील नागरिकांसह परिसरातील नागरिकांनी आमगाव पोलीस ठाण्याकडे धाव घेतली असून पोलीस ठाण्यासमोर मोठी गर्दी गोळा झालेली आहे.पोलीस कोठडीतून आरोपी फरार झाल्याने नव्या वादाला तोंड फुटले आहे.
विशेष म्हणजे यापुर्वी याच पोलीस ठाण्यात एका आरोपीचा मारहाणीदरम्यान पोलीस कोठडीतच मृत्यू झाल्याचे प्रकरण घडले होते.त्यावेळी सुध्दा पोलीस अधिकारी व कर्मचारी निलंबित झालेले होते.आत्ता या प्रकरणामुळे पुन्हा आमगाव पोलीस ठाणे चर्चेत आले आहे.जेव्हा आमगाव पोलीस ठाणे आणि उपविभागीय पोलीस अधिकारी यांचे कार्यालय एकमेकाला लागूनच असताना अशा प्रकार घडलाच कसा नागरिकांनी सवाल केला आहे.यांसदर्भात पोलीस निरिक्षक विलास नळे यांच्याशी संपर्क साधला असता आरोपीच्या शोधात असल्याने बोलणे होऊ शकले नाही.