परभणी राष्ट्रीय महामार्गावर भेगांबरोबर काटेरी बाभळीचे प्रस्त वाढले..!सिमेंट रस्त्याबरोबर साईड पट्ट्यालाही पडल्या भेग.ा

परभणी (प्रतिनिधी) : गंगाखेड येथून परभणीकडे जाणाऱ्या बहूचर्चित गंगाखेड परभणी राष्ट्रीय महामार्गावर सिमेंट रस्त्याला जागोजागी पडलेल्या भेगांबरोबर आता साईड पट्ट्यालाही भेगा पडल्याने व काटेरी बाभळीचे प्रस्त ही मोठ्या प्रमाणात वाढल्यामुळे राष्ट्रीय महामार्ग विभागाच्या अधिकाऱ्यांनी याकडे वेळीच लक्ष द्यावे अशी मागणी वाहन धारकांतून केली जात आहे. 

निर्मितीपासूनच या ना त्या नाना विविध कारणाने चर्चेत असलेल्या गंगाखेड परभणी या  राष्ट्रीय महामार्गाच्या सिमेंट रस्त्यावर काम सुरु असतांनाच अनेक ठिकाणी भेगा पडल्या होत्या त्याची डागडुजी संपत नाही तोपर्यंत दुसऱ्या ठिकाणी भेगा पडत असल्याने रस्त्यावर सर्वत्र भेगाच भेगा पहावयास मिळत असल्यामुळे या महामार्ग कामाच्या गुणवत्तेवर अनेकवेळा प्रश्न उपस्थित करण्यात आले.

गंगाखेड परभणी महामार्गावर रस्त्याला जागोजागी पडलेल्या भेगामुळे अपघात घडल्याने अनेक दुचाकी स्वार जखमी झाल्याच्या घटना घडल्या आहे. रस्त्यावर पडलेल्या भेगा बुजविण्याचे काम चालू असले तरी रस्त्याच्या बाजूने साईड पट्ट्यावर भरलेल्या मुरूमाच्या भरावालाही भेगा पडत आहे. या भेगांच्या संकटाबरोबर या राष्ट्रीय महामार्गाच्या बाजूने मोठ्या प्रमाणात वाढलेल्या काटेरी बाभळीच्या झाडाच्या फांद्या रस्त्यावर आल्याने या फांद्याचा फटका ही दुचाकी स्वारांना बसत आहे. विशेषत रात्रीच्या वेळी याचा त्रास अधिक प्रमाणात होत असून  राष्ट्रीय महामार्गाच्या बाजूने वाढलेली काटेरी बाभळीच्या फांद्या रस्त्यावर आल्या असतांना ही याकडे महामार्गाचे अधिकारी किंवा याचे काम करणाऱ्या कंपनीचे लक्ष आहे का असा संतप्त सवाल वाहन धारकांतुन उपस्थित केल्या जात आहे.

रस्त्यावर पडलेल्या भेगा बुजविण्यासाठी सततच सुरु असलेल्या डागडुजीच्या कामामुळे रस्त्यावर पडलेल्या भेगा बुजविण्याचे नाटक न करता या भेगा कायमच्या बुजवाव्या अशी मागणी वाहन धारकांतुन केली जात आहे. सतत सुरु असलेल्या कामामुळे गंगाखेड परभणी राष्ट्रीय महामार्गाचे काम संपले की सुरू आहे हे अद्यापही वाहन धारकांना समजले नाही. वारंवार रस्त्यावर भेगा पडत असल्यामुळे या रस्त्याच्या गुणवत्तेविषयी शंका उपस्थित करून राष्ट्रीय महामार्ग विभागाच्या अधिकाऱ्यांनी याकडे लक्ष देऊन रस्त्यावरील भेगा बुजविण्याबरोबर रस्त्यावर पसरलेल्या काटेरी बाभळीच्या फांद्याचा बंदोबस्त करावा अशी मागणी केली जात आहे.

केंद्रीय मंत्री नितीन गडकरी कारवाई करणार का?

केंद्रीय मंत्री नितीन गडकरी यांच्या संकल्पनेतून संपूर्ण देशात सिमेंट रोडची संकल्पना राबवली जात आहे. देशात सगळीकडे  राष्ट्रीय महामार्ग सिमेंटचे बनवले गेले मात्र या महामार्गाचे काम करणाऱ्या कंत्राटदारांच्या कंपनीवर कोणाचेच नियंत्रण ठेवले नाही. एखाद्या लोकप्रतिनिधीने कामाच्या दर्जाबाबत आग्रही घेतली असेल तर नितीन गडकरी यांनी त्या लोकप्रतिनिधींवर लाच मागत असल्याचा ठपका ठेवल्यामुळे या कामांवर लोकप्रतिनिधीनी फारसे लक्ष दिले नाही.

याचाच फायदा घेत कंत्राटदार कंपन्यांनी  राष्ट्रीय महामार्गाची कामे अतिशय सुमार दर्जाची केल्याचे गंगाखेड परभणी रस्त्याची अवस्था पाहून समोर येत आहे. याला जबाबदार कोण जनतेच्या पैशाचा हिशोब कोणाकडे मागायचा ? अशा बोगस काम करणाऱ्या कंत्राटदारांच्या कंपन्यांवर तसेच यावर नियंत्रण ठेवणाऱ्या राष्ट्रिय महामार्ग विभागाच्या अधिकाऱ्यावर केंद्रीय मंत्री नितीन गडकरी कारवाई करणार का ? असा सवाल ही नागरिकांतून उपस्थित केला जात आहे.