केज (प्रतिनिधी) मराठ्यांना जोपर्यंत सरकार आरक्षण देत नाही तोपर्यंत मतदानावर बहिष्कार आणि पुढार्यांना गावबंदी करण्याचा एक विशेष निर्णय केज तालुक्यातील चंदनसावरगाव येथील ग्रामस्थांनी ग्रामसभा घेऊन घेतला आहे.
चंदनसावरगावमधे सुरू असलेल्या या उपोषणाला पाठिंबा म्हणून गावातील लहानथोर महिला पुरुष व बालगोपाळांनी गावातून मोठी रॅली काढली. ढोल ताशा वाजवत गावभर फिरून एक मराठा लाख मराठा घोषणाबाजी केली आणि शेवटी या रॅलीचे रुपांतर भल्या मोठ्या सभेत झाले. चंदनसावरगाव येथील जिल्हा परिषद शाळेच्या आवारात हा भव्य कार्यक्रम झाला.
यावेळी ग्रामस्थांनी ग्रामसभा घेतली आणि जोपर्यंत मराठा आरक्षण मिळत नाही तोपर्यंत मतदानावर बहिष्कार घालण्याचा निर्णय घेण्यात आला तसेच जोपर्यंत मराठा आरक्षण मिळत नाही तोपर्यंत पुढार्यांनाही गावबंदी करण्याचा क्रांतीकारी ठराव एकमुखाने या ग्रामसभेत घेण्यात आला असल्याची माहिती शंकरबापू तपसे , बालासाहेब तपसे, गणेश चाळक, नामदेव मगर, गणेश तपसे, संजीव तपसे इत्यादींनी दिली. गावातील राजकीय गटतट बाजूला ठेवून गावकऱ्यांनी सर्वांनी मिळून गावाची एकी करुन गावभर रॅली काढून ग्रामसभा घेऊन त्यामध्ये घेतलेला हा ठराव गावकऱ्यांनी सरकारला आणि जरांगे पाटील यांना पाठवला आहे.
मराठा आरक्षणावर झालेली गावकऱ्यांची एकी पाहून उपोषणकर्ते डिगांबर तपसे यांनी समाधान व्यक्त केले आहे. चंदनसावरगावकरांच्या या निर्णयाचे मराठा समाजाकडून कौतुक केले जात आहे तसेच जोपर्यंत सरकार मराठ्यांना आरक्षण देत नाही तोपर्यंत हा लढा मोठ्या खंबीरपणे चालूच राहील असे गावकऱ्यांनी सांगितले.
No comments:
Post a Comment