मस्साजोगचे सरपंच संतोष देशमुख यांची हत्या. खंडणी प्रकरणी मोठा पुरावा वाल्मीक कराड, सुदर्शन घुले, प्रतीक घुले एकत्र, “त्या” दिवशीचे सीसीटीव्ही फुटेज समोर

बीड (प्रतिनिधी) मस्साजोगचे सरपंच संतोष देशमुख यांच्या हत्येप्रकरणी वाल्मीक कराडवर मकोकाअंतर्गत कारवाई करण्यात आली आहे. कराड सध्या पोलीस कोठडीत असून त्यांच्या अडचणीत वाढ होणार आहे. आवादा कंपनीच्या अधिकाऱ्या कडे दोन कोटी रुपयांची खंडणी ज्या दिवशी मागितली गेली, त्यादिवशीचे सीसीटीव्ही फुटेज समोर आले आहेत. या फुटेज मध्ये वाल्मिक कराड, सुदर्शन घुले आणि प्रतीक घुले हे केज शहरातील आरोपी विष्णू चाटेच्या कार्यालयात एकत्र येताना दिसत आहेत. खंडणी प्रकरणी हा मोठा पुरावा असून आता काय कारवाई केली जाते, हे पाहावे लागणार आहे.

वाल्मीक कराड आणि विष्णू चाटे या दोघांनी 29 नोव्हेंबरला आवादा कंपनीला खंडणी मागितली होती. ही खंडणी ज्या दिवशी मागण्यात आली होती, त्या दिवशीचे सीसीटीव्ही फुटेज समोर आले आहेत. 29 नोव्हेंबरला वाल्मीक कराड हा विष्णू चाटे याच्या कार्यालयात आलेला दिसत आहे. यावेळी कराडसोबत सुदर्शन घुले, प्रतीक घुले हे छत्रपती शिवाजी महाराज चौकातील विष्णू चाटे याच्या कार्यालयात आले होते. अवादा कंपनीच्या खंडणी प्रकरणातील हा सर्वात मोठा पुरावा असल्याचे आता मानले जात आहे.

दरम्यान, संतोष देशमुख हत्या प्रकरणात संशयास्पद भूमिकेत राहिलेले आणि निलंबित झालेले पीएसआय राजेश पाटील हे देखील वाल्मीक कराडसोबत विष्णू चाटे याच्या कार्यालयात येताना दिसत आहेत. त्यामुळे आता आवादा कंपनीकडून ज्या दिवशी खंडणी मागण्यात आली होती, त्यादिवशी पीएसआय राजेश पाटील हे वाल्मीक कराडला का भेटले असावेत, असा प्रश्न आता उपस्थित केला जात आहे. कारण याआधी आवादा कंपनीमधील वॉचमेनला मारहाण झाली होती, त्याच्या एक दिवसानंतर राजेश पाटील एका हॉटेलमध्ये वाल्मीक कराडसोबत दिसले होते. यानंतर आता पुन्हा एकदा राजेश पाटील हे वाल्मीक कराडसोबत दिसून आल्यामुळे त्यांच्या अडचणीत वाढ झाली आहे. त्यामुळे आता निलंबित पीएसआय राजेश पाटील याची देखील सीआयडी आणि एसआयटीकडून चौकशी होण्याची शक्यता आहे.