महावितरणचा भोंगळ कारभार: वरोरा येथे उखर्डा गावात नवीन 'स्मार्ट मीटर' जळाले नवीन मीटरसाठी पैसे मागितल्याने ग्राहकाचा तीव्र संताप!

वरोरा (प्रतिनिधी):महावितरण कंपनीकडून काही दिवसांपूर्वीच बसवण्यात आलेले नवीन 'स्मार्ट मीटर' तांत्रिक बिघाडामुळे जळाल्याची घटना उखर्डा (ता. वरोरा, जि. चंद्रपूर) येथे घडली आहे. यामुळे बाधित ग्राहक प्रभाकरराव वामन कुडे यांचे कुटुंब गेल्या ४ दिवसांपासून पूर्णपणे अंधारात दिवस काढत आहे. महावितरणच्या चुकीमुळे आणि उपकरणातील दोषामुळे मीटर जळाले असताना, नवीन मीटर बसवण्यासाठी कंपनीचे अधिकारी पैसे मागून ग्राहकाची अडवणूक करत असल्याचा गंभीर आरोप ग्राहकाने केला आहे.   

काय घडला नेमका प्रकार?

उखर्डा येथील रहिवासी आणि महावितरणचे अधिकृत वीज ग्राहक प्रभाकरराव कुडे (ग्राहक क्र. ४५९०९००००५२४६) यांच्या घरी महावितरणने जुने मीटर काढून नवीन स्मार्ट मीटर बसवले होते. मात्र, बसवल्यानंतर अवघ्या काही दिवसांतच तांत्रिक त्रुटी किंवा व्होल्टेजमधील चढ-उतारामुळे हे मीटर अचानक जळाले. यात ग्राहकाची कोणतीही चूक किंवा फेरफार (Tampering) झालेली नाही.   

कायद्याचा आणि नियमांचा भंग:

महाराष्ट्र विद्युत नियामक आयोग (MERC) नियम २०२० (Standards of Performance) आणि 'विद्युत कायदा २००३' च्या कलम ५५ नुसार, जर तांत्रिक दोषाने किंवा उपकरणातील दोषाने मीटर जळाले असेल, तर ग्राहकाला कोणताही अतिरिक्त खर्च किंवा दंड न लावता त्वरित नवीन मीटर देणे आणि वीज पुरवठा सुरळीत करणे ही परवानाधारक महावितरण कंपनीची कायदेशीर जबाबदारी आहे.   

ग्राहकाची आक्रमक भूमिका - "पैसे भरणार नाही!"

कंपनीच्या निष्काळजीपणामुळे आणि निकृष्ट दर्जाच्या स्मार्ट मीटरमुळे ही समस्या निर्माण झाली असताना, महावितरणचे अधिकारी नवीन मीटरसाठी पैसे भरण्यास सांगत आहेत. "आमची कोणतीही चूक नसताना आम्ही पैसे का भरावे?" असा सवाल करत प्रभाकरराव कुडे यांनी आज सहाय्यक अभियंता / उपकार्यकारी अभियंता, नागरी उपविभाग, महावितरण वरोरा यांना लेखी अर्ज देऊन विनामूल्य नवीन मीटर त्वरित बसवून देण्याची मागणी केली आहे.   

तसेच, जर महावितरणने त्वरित व मोफत वीज पुरवठा पूर्ववत केला नाही, तर MERC कडे तक्रार दाखल करून महावितरणविरोधात तीव्र आंदोलन छेडण्याचा इशाराही ग्राहकाने दिला आहे.

वीज मीटर बदलण्यासाठी महावितरणचा वरिष्ठ तंत्रज्ञ.ला 13 हजारांची लाच, ACBने रंगेहात पकडले.

परळी वैजनाथ (प्रतिनिधी) फॉल्टी वीज मीटर बदलून वीजपुरवठा सुरळीत करून देण्यासाठी १३ हजार रुपयांची लाच स्वीकारताना परळी येथील महावितरणच्या अतिरिक्त कार्यकारी अभियंता कार्यालयाचे वरिष्ठ तंत्रज्ञ अरूण सुरेश गितेला जालना येथील लाचलुचपत प्रतिबंधक विभागाच्या पथकाने रविवारी रंगेहाथ पकडले. परळी शहरातील जिरगेनगर येथील डीपीजवळ रविवारी दुपारी सव्वा एकच्या सुमारास ही कारवाई करण्यात आली.

तक्रारीची पडताळणी करण्यासाठी तक्रारदार पंचासह महावितरणच्या परळी कार्यालयात गेले. परंतु त्या ठिकाणी अरुण गीते हे उपस्थित नव्हते. त्यानंतर तक्रारदारांनी गीते यांच्याशी फोनवरून संपर्क साधला. त्यांनी तक्रारदारास शहरातील माऊलीनगर येथे बोलावून घेतले. त्या ठिकाणी झालेल्या चर्चेदरम्यान गीते यांनी १५ हजार रुपयांची लाच मागितली. तडजोडीनंतर १३ हजार रुपये स्वीकारण्याचे मान्य केले. रविवारी दुपारी १.१० वाजता जिरगेनगर येथील डीपीजवळ तक्रारदाराकडून १३ हजार रुपयांची लाच स्वीकारताना वरिष्ठ तंत्रज्ञ अरुण गीते यांना पथकाने रंगेहाथ पकडले. जालना लाचलुचपत प्रतिबंधक विभागाचे पोलिस उपअधीक्षक बी. एस. जाधवर यांच्या मार्गदर्शनाखाली पोलिस जमादार गजानन घायवट, पोलिस अंमलदार मनोहर भुतेकर, गजानन कांबळे, शिवलिंग खुळे, गणेश चेके, पोलिस नाईक कापसे यांच्या पथकाने ही कारवाई केली.

या प्रकरणी गुन्हा दाखल करण्याची प्रक्रिया रविवारी रात्री सुरू होती. दरम्यान, परळीतील जलालपूर भागात भाड्याने राहत असलेल्या गीते यांच्या घराची झडती लाचलुचपत प्रतिबंधक विभागाचे बीड येथील अधिकारी समाधान कवडे यांच्या पथकाने घेतल्याचे वृत्त आहे.

कुटुंब अखंड हरिनाम सप्ताहाच्या कीर्तनात इकडे चोरट्यांनी घर केले साफ!कपाटातील सोने अन् रोकड लंपास.

आष्टी (प्रतिनिधी): गावात सुरू असलेल्या अखंड हरिनाम सप्ताहाच्या कीर्तनासाठी कुटुंब घराला कुलूप लावून गेले असताना, अज्ञात चोरट्यांनी बंद घराचे दार उचकटून आत प्रवेश करत कपाटातील दीड तोळे सोने आणि ५० हजार रुपयांची रोख रक्कम लंपास केल्याची घटना घडली. ही घरफोडी आष्टी तालुक्यातील सुर्डी येथे बुधवारी रात्री घडली असून, कीर्तन संपवून कुटुंब घरी परतल्यानंतर हा धक्कादायक प्रकार उघडकीस आला.

सप्ताहात कीर्तनाला गेले अन् घडला अनर्थ
सुर्डी येथे सध्या अखंड हरिनाम सप्ताह सुरू आहे. गावातील रहिवासी शेतकरी जालिंदर अर्जुन गर्जे हे बुधवारी रात्री घराला कुलूप लावून सहकुटुंब सप्ताहातील कीर्तन ऐकण्यासाठी गेले होते. घर बंद असल्याची संधी साधत अज्ञात भामट्यांनी घराच्या दरवाजा एका बाजूने उचकटून आत प्रवेश केला. चोरट्यांनी घरातील साहित्याची उचकापाचक करत कपाटात ठेवलेले सुमारे दीड तोळे सोन्याचे दागिने आणि ५० हजार रुपयांची रोकड असा लाखोंचा ऐवज लंपास केला.

कीर्तन संपवून घरी आल्यावर प्रकार उघड
रात्री उशिरा कीर्तन संपल्यानंतर गर्जे कुटुंब घरी परतले असता त्यांना घराचा दरवाजा उघडा आणि सामानाची दाणादाण उडाल्याचे दिसले. कपाटातील दागिने व रोख रक्कम गायब असल्याचे लक्षात येताच त्यांच्या पायाखालची जमीन सरकली. या चोरीच्या घटनेमुळे गावात एकच खळबळ उडाली आहे. या प्रकरणी आष्टी पोलीस ठाण्यात गुन्हा दाखल करण्याची प्रक्रिया सुरू होती.

हिंद नगर-भवानी नगरमधील अवैध दारू विक्री बंद करा.नवीन दारू दुकानास स्थलांतरास परवानगी देऊ नये. नागरिकांचे प्रशासनाला निवेदन - प्रशांत कराड

परळी वैजनाथ (प्रतिनिधी) शहरातील हिंद नगर व भवानी नगर परिसरात सुरू असलेल्या अनधिकृत दारू विक्रीमुळे नागरिकांना मोठ्या त्रासाला सामोरे जावे लागत असल्याने ही अवैध दारू विक्री तातडीने बंद करावी, तसेच परिसरात नवीन दारू दुकानास परवानगी देऊ नये अथवा विद्यमान दुकानाचे स्थलांतर करू नये, अशी मागणी करणारे निवेदन नागरिकांच्या वतीने प्रशासनाला देण्यात आले.

याबाबत मा. पंकजाताई गोपीनाथराव मुंडे, पशुसंवर्धन व पर्यावरण व हवामान बदल मंत्री, जिल्हाधिकारी बीड, पोलीस अधीक्षक बीड आणि अधीक्षक, राज्य उत्पादन शुल्क विभाग बीड यांना निवेदन देण्यात आले. भाजपाचे परळी शहर उपाध्यक्ष प्रशांत केशवराव कराड तसेच हिंद नगर व भवानी नगर परिसरातील नागरिकांच्या स्वाक्षऱ्यांसह हे निवेदन सादर करण्यात आले.

निवेदनात म्हटले आहे की, परिसरात अधिकृत तसेच अनधिकृत दारू विक्रीच्या ठिकाणांमुळे नागरिकांच्या दैनंदिन जीवनावर परिणाम होत आहे. दारू सेवन करून सार्वजनिक ठिकाणी धिंगाणा घालणे, भांडणे, हाणामारी, शिवीगाळ करणे, रस्त्यावर पडून राहणे, नागरिकांच्या घरांसमोर लघुशंका करणे तसेच येणाऱ्या-जाणाऱ्या नागरिकांना त्रास देणे, अशा प्रकारांमुळे महिला, लहान मुले, ज्येष्ठ नागरिक आणि सर्वसामान्य कुटुंबांच्या सुरक्षिततेचा प्रश्न निर्माण होत असल्याचे निवेदनात नमूद करण्यात आले आहे.

विशेषतः अनधिकृत दारू विक्रीवर केवळ कागदोपत्री कारवाई न करता राज्य उत्पादन शुल्क विभाग व पोलीस प्रशासनाने संयुक्तपणे प्रत्यक्ष पाहणी करून कठोर कायदेशीर कारवाई करावी, अशी मागणी नागरिकांनी केली आहे. तसेच ड्राय डेच्या दिवशीही अवैध दारू विक्री होत असल्याच्या तक्रारींची चौकशी करून दोषींवर कारवाई करण्याची मागणी करण्यात आली आहे.

दरम्यान, शासनाच्या नशामुक्ती व व्यसनमुक्ती अभियानाच्या पार्श्वभूमीवर अवैध दारू विक्रीलाही आळा घालणे आवश्यक आहे, असे निवेदनात नमूद करण्यात आले आहे. तरुण पिढीला व्यसनापासून दूर ठेवण्यासाठी अमली पदार्थांविरोधात कारवाईसोबतच अवैध दारू विक्रीवरही प्रभावी नियंत्रण आवश्यक असल्याचे नागरिकांनी म्हटले आहे.

हिंद नगर व भवानी नगर परिसरातील नागरिकांना सुरक्षित आणि शांततापूर्ण वातावरण मिळावे, यासाठी प्रशासनाने तातडीने प्रत्यक्ष पाहणी करून अवैध दारू विक्री बंद करावी. तसेच या परिसरात नवीन दारू दुकानास परवानगी देऊ नये किंवा विद्यमान दुकानाचे स्थलांतर करू नये, अशी ठाम मागणी निवेदनाद्वारे करण्यात आली आहे.

या मागणीची दखल घेऊन प्रशासनाने तातडीने कार्यवाही न केल्यास नागरिकांना लोकशाही मार्गाने आंदोलन अथवा उपोषणाचा मार्ग स्वीकारावा लागू शकतो, असा इशाराही निवेदनातून देण्यात आला आहे.

अहिल्यानगर-पाथर्डी मार्गावर भरधाव ट्रॅव्हल्स रस्त्यावर उलटली. २० प्रवासी थोडक्यात बचावले

आष्टी (प्रतिनिधी) : पुण्याहून नांदेडकडे निघालेली खासगी ट्रॅव्हल्स अहिल्यानगर-पाथर्डी मार्गावर अचानक तांत्रिक बिघाड झाल्याने रस्त्यावर पलटी झाल्याची घटना घडली. हा भीषण अपघात आष्टी तालुक्यातील मराठवाडी येथील हॉटेल सम्राटसमोर पहाटे ३:२५ वाजण्याच्या सुमारास घडला. सुदैवाने या अपघातात कोणतीही जीवितहानी झाली नसून, गाडीतील सर्व २० प्रवासी किरकोळ जखमी झाले आहेत.

गाढ झोपेत असतानाच उलटली बस
'स्वामी टूर्स ॲन्ड ट्रॅव्हल्स'ची बस (क्रमांक ए.आर. ०६, बी. ६७००) पुण्यावरून अहिल्यानगर-पाथर्डी मार्गे नांदेडच्या दिशेने २० प्रवाशांना घेऊन जात होती. पहाटेच्या वेळी बहुतांश प्रवासी गाढ झोपेत असताना आष्टी तालुक्यातील मराठवाडी शिवारात ट्रॅव्हल्समध्ये अचानक तांत्रिक बिघाड झाला आणि चालकाचे वाहनावरील नियंत्रण सुटल्याने बस थेट रस्त्यावर उलटली. अचानक झालेल्या या अपघातामुळे प्रवाशांमध्ये मोठी घबराट उडाली; मात्र नशीब बलवत्तर असल्याने सर्व प्रवासी मोठ्या अनर्थातून बचावले. जखमी प्रवाशांना उपचारासाठी तातडीने अहिल्यानगर येथील रुग्णालयात दाखल करण्यात आले आहे.

अंभोरा पोलिसांकडून अवघ्या ३० मिनिटांत मदतकार्य
पहाटे ३:२५ च्या सुमारास अपघाताची माहिती मिळताच अंभोरा पोलीस ठाण्याचे सहायक पोलीस निरीक्षक विक्रांत हिंगे यांच्या मार्गदर्शनाखाली पोलीस पथकाने तत्परता दाखवली. पोलीस अंमलदार शिवदास केदार, अमोल शिरसाठ, कृष्णा नरवडे, प्रकाश पडवळ, सोपान येवले आणि होमगार्ड धुमाळ यांनी अवघ्या ३० मिनिटांत घटनास्थळी धाव घेतली. पोलिसांनी स्थानिक नागरिकांच्या मदतीने बचावकार्य राबवून सर्व जखमी प्रवाशांना खासगी रुग्णवाहिकेद्वारे उपचारासाठी अहिल्यानगर येथे हलवले.

चालकाला मारहाण करून कार पळवणारे दोन भामटे गजाआड; 'डायल ११२' मुळे अवघ्या १०५ मिनिटांत कारवाई.

बीड (प्रतिनिधी) मूळचे कोळगाव (ता. गेवराई) येथील रहिवासी व सध्या शांतीनिकेतन शाळेजवळ राहणारे अशोक दत्तात्रय करांडे (वय ४२) हे १९ सप्टेंबर रोजी मध्यरात्री दोनच्या सुमारास घरासमोर मित्राची कार (एमएच २३ एडी १४२४) घेऊन थांबले होते. त्यावेळी आलेल्या दोन भामट्यांनी "आम्हाला तुझी गाडी दे" अशी दमदाटी करत करांडे यांना कारमधून बाहेर ओढून मारहाण केली आणि गाडी घेऊन पसार झाले.

घटनेनंतर करांडे यांनी तात्काळ 'डायल ११२' वर संपर्क साधला. माहिती मिळताच शिवाजीनगर पोलिस पथकाने शहरात नाकाबंदी करून पाठलाग सुरू केला आणि रात्री ३:४५ वाजता अंबिका चौक परिसरातून पळवून नेलेली कार जप्त केली. या प्रकरणात सुधीर हनुमान वाघमारे (वय २५) व प्रीतम गणेश हनवते (वय १९, दोघे रा. शाहूनगर, बीड) यांना अटक करून गुन्हा नोंदवण्यात आला आहे. ही कारवाई पोलिस निरीक्षक शीतलकुमार बल्लाळ, अंमलदार भास्कर केंद्र, संतोष राऊत व सचिन आगलावे यांनी केली.

‘डायल ११२’ ची तत्परता ठरली गेमचेंजर
नागरिकांच्या सुरक्षेसाठी कार्यरत असणाऱ्या 'डायल ११२' प्रणालीवर कॉल प्राप्त होताच शिवाजीनगर पोलिस पथकाने दाखवलेले प्रसंगावधान व अवघ्या १०५ मिनिटांत आरोपींना बेड्या ठोकून केलेली यशस्वी कामगिरी वाखाणण्याजोगी आहे.

शाहूनगर परिसरातील दोन भामट्यांना अटक

अटक करण्यात आलेले सुधीर वाघमारे आणि प्रीतम हनवते हे दोघेही शहरातील शाहूनगर भागातील रहिवासी असून, मध्यरात्री रस्त्यावर दादागिरी करत वाहन हिसकावून घेण्याचा त्यांचा प्रयत्न पोलिसांनी त्वरित उधळून लावला आहे.

हालगे गल्ली ३३ वर्षांची परंपरा!मिरवणुकी ऐवजी नवचैतन्य गणेश मंडळाचा भव्य महाप्रसाद.

*आज ज्ञानेश्वर महाराज उखळीकर यांचे कीर्तन; उद्या हजारो भाविकांना महाप्रसाद

परळी वैजनाथ | (प्रतिनिधी)  परळी शहरातील हालगे गल्ली येथील नवचैतन्य गणेश मंडळाच्या वतीने गेल्या ३३ वर्षांपासून गणेशोत्सवात मिरवणूक न काढता विविध सामाजिक व धार्मिक उपक्रम राबविण्याची परंपरा यंदाही कायम ठेवण्यात आली आहे. यानिमित्त गुरुवार, दि. २४ सप्टेंबर रोजी सायंकाळी ७ ते १० वाजेपर्यंत भागवताचार्य श्री ह.भ.प. ज्ञानेश्वर महाराज उखळीकर यांचे भव्य कीर्तन आयोजित करण्यात आले आहे.

श्रीधाम वृंदावन गौरक्षक सेना व सनातन रक्षक सेना फाउंडेशनचे मराठवाडा प्रदेशाध्यक्ष असलेले ज्ञानेश्वर महाराज उखळीकर यांच्या कीर्तनाचा लाभ भाविकांना घेता येणार आहे.

दरवर्षीप्रमाणे यंदाही शुक्रवार, दि. २५ सप्टेंबर रोजी भव्य-दिव्य महाप्रसादाचे आयोजन करण्यात आले आहे. दुपारी १ ते सायंकाळी ५ वाजेपर्यंत महाप्रसादाचे वितरण करण्यात येणार असून, दरवर्षी या महाप्रसादाचा सुमारे दहा हजार भाविक लाभ घेतात.

गणेशोत्सवात अनावश्यक खर्च व मिरवणुकीऐवजी गेल्या ३३ वर्षांपासून धार्मिक आणि सामाजिक उपक्रमांना प्राधान्य देणाऱ्या नवचैतन्य गणेश मंडळाच्या या उपक्रमाचे परिसरासह पंचक्रोशीत कौतुक होत आहे. विशेष म्हणजे हालगे गल्लीतील सर्व युवक एकत्र येऊन हा उपक्रम उत्साहाने राबवितात.

कीर्तन व महाप्रसादाचा हजारो भाविकांनी लाभ घ्यावा, असे आवाहन नवचैतन्य गणेश मंडळ, हालगे गल्ली यांच्या वतीने करण्यात आले आहे.

जमात-ए-इस्लामी हिंद परळीच्या वतीने MBBS साठी निवड झालेल्या विद्यार्थ्यां चा भव्य सत्कार.

 *डॉक्टर बनून करणार मानवतेची सेवा" – GMC मध्ये निवड झाल्यावर परळीच्या गुणवंत विद्यार्थ्यांचा संकल्प

परळी वैजनाथ (प्रतिनिधी) : सर्वसामान्य पार्श्वभूमी असलेल्या परळी शहरातील दोन गुणवंत विद्यार्थ्यांनी NEET परीक्षेत घवघवीत यश संपादन करत शासकीय वैद्यकीय महाविद्यालयांमध्ये (GMC) आपले स्थान पक्के केले आहे.

विद्यार्थी शेख मोहम्मद झैद मोईन अहमद याला GMC नागपूर आणि सय्यद हुझैफा सय्यद जावेद याला GMC नाशिक येथे MBBS अभ्यासक्रमासाठी प्रवेश मिळाला आहे. या गौरवपूर्ण ऐतिहासिक यशाबद्दल जमात-ए-इस्लामी हिंद (JIH), परळी यांच्या वतीने एका विशेष सन्मान सोहळ्याचे आयोजन करून दोन्ही विद्यार्थ्यांचा भव्य सत्कार करण्यात आला.या गरिमापूर्ण सोहळ्यात दोन्ही भावी डॉक्टरांना शाल आणि फुलांचा हार घालून सन्मानित करण्यात आले. 

या भावुक प्रसंगी दोन्ही विद्यार्थ्यांनी समाजासमोर एक आदर्श वस्तुपाठ ठेवला. त्यांनी उपस्थित जनसमुदायासमोर संकल्प करत वचन दिले की –

"आम्ही भविष्यात एक डॉक्टर म्हणून पूर्ण निष्ठा आणि प्रामाणिकपणे समाजातील गरीब व गरजू लोकांवर उपचार करून मानवतेची सेवा करू."

सोहळ्याला संबोधित करताना जमातचे ज्येष्ठ पदाधिकारी सय्यद अन्वर सर यांनी दोन्ही विद्यार्थ्यांचे अभिनंदन केले आणि त्यांना भविष्यासाठी अत्यंत मोलाचे मार्गदर्शन केले. ते म्हणाले की, "विद्यार्थ्यांनी नेहमी आपल्या मुख्य ध्येयावर लक्ष केंद्रित (फोकस) ठेवावे. आता एक डॉक्टर म्हणून त्यांच्यावर जी मोठी जबाबदारी आली आहे, ती पूर्ण निष्ठेने पार पाडावी. जनकल्याण आणि समाजाची सेवा करणे हेच एका डॉक्टरचे परम कर्तव्य आहे."

जमात-ए-इस्लामी हिंद, परळीचे अध्यक्ष सय्यद इफ्तेखार सर यांनीही दोन्ही विद्यार्थ्यांच्या उज्ज्वल भविष्यासाठी शुभेच्छा दिल्या आणि म्हणाले की, जर इरादे पक्के असतील तर मर्यादित साधनांमध्येही मोठे यश मिळवता येते, हे या मुलांनी सिद्ध करून दाखवले आहे.या प्रसंगी जमात-ए-इस्लामी हिंदचे सर्व सन्माननीय अरकान (सदस्य) आणि शहरातील प्रतिष्ठित नागरिक मोठ्या संख्येने उपस्थित होते. सर्वांनी विद्यार्थ्यांच्या पालकांचे त्याग आणि मुलांच्या कठोर परिश्रमाचे कौतुक केले. हे यश संपूर्ण परळी शहरासाठी एक मोठी प्रेरणा आहे

शिवनाम जपातून शरीरशुद्धी; शांततेसाठी सामूहिक प्रयत्न करा. मुला-मुलींना संस्कारांची शिदोरी द्या लिंगपूजा भस्म धारणेची शिकवण द्या.:- सिद्धचैतन्य शिवाचार्य महाराज.

*परळीत संत श्री गुरूलिंग स्वामींच्या १२५ व्या पुण्यतिथी महोत्सवाची उत्साहात सांगता*

परळी वैजनाथ (प्रतिनिधी) वैद्यनाथनगरी परळी येथे वीरशैव लिंगायत समाज परळी व श्री गुरूलिंग स्वामी देवस्थानच्या वतीने दि. १५ सप्टेंबर पासून सुरू असलेल्या संतश्रेष्ठ श्री गुरूलिंग स्वामी यांच्या १२५ व्या पुण्यतिथी महोत्सव व अखंड शिवनाम सप्ताहाची मंगळवार, दि. २२ सप्टेंबर रोजी उत्साहात सांगता झाली. यानिमित्त श्री गुरूलिंग स्वामी महाराजांच्या पालखीचा भव्य सोहळा काढण्यात आला. शिवनामाचा अखंड गजर, ‘ॐ नमः शिवाय’ गुरुराज माऊलीचा जयघोष, आणि ठिकठिकाणी भाविकांकडून पालखीवर करण्यात आलेली पुष्पवृष्टी यामुळे संपूर्ण परळी शहर भक्तिरसात न्हाऊन निघाले.

यावेळी सद्गुरू ष.ब्र.१०८ श्री सिद्धचैतन्य शिवाचार्य महाराज साखरखेर्डेकर यांनी उपस्थित भाविकांना आशीर्वचन देताना सामाजिक व सार्वजनिक शांततेसाठी सर्वांनी सामूहिक प्रयत्न करावेत तसेच शरीरशुद्धीसाठी शिवनामाचा जप करावा, असे आवाहन केले. सिद्ध चैतन्य महाराज म्हणाले की, वीरशैव लिंगायत समाज मोठा आहे. या समाजाच्या पुढील पिढीला चांगले संस्कार देणे ही प्रत्येकाची जबाबदारी आहे. समाजातील मुला-मुलींना लहानपणापासून लिंगपूजा, भस्मधारणेसह आपल्या धार्मिक परंपरा आणि संस्कारांची शिकवण दिली पाहिजे. संस्कारक्षम पिढी घडली तरच समाजाची प्रगती अधिक भक्कमपणे होईल. प्रत्येक धार्मिक व सामाजिक कार्यक्रमात महिला मोठ्या उत्साहाने सहभागी होत असतात. हीच खरी स्त्रीशक्ती आहे. महिलांप्रमाणेच पुरुषांनीही हिरिरीने प्रत्येक कार्यक्रमात सहभागी होऊन समाजापुढे आदर्श निर्माण करावा, असे आवाहनही सिद्धचैतन्य शिवाचार्य महाराज यांनी केले.

परळी ही ज्योतिर्लिंग प्रभू श्री वैद्यनाथाची पावन नगरी आहे. श्रावण मासानिमित्त येथे प्रभू वैद्यनाथाच्या दर्शनासोबतच शिवाचार्यांचे अनुष्ठान होत असते. अशा पवित्र नगरीत शिवाचार्यांचे दर्शन व आशीर्वाद घेण्याचे भाग्य लाभणे ही मोठी गोष्ट आहे, असे सांगत महाराजांनी परळीच्या धार्मिक महत्त्वावर प्रकाश टाकला. मनुष्य जीवन अनमोल आहे. प्रत्येकाने शिवनामाचा जप करावा, भक्तीच्या मार्गाने चालावे; तरच जीवनाचे सार्थक होईल, असा संदेशही त्यांनी दिला.

*शिवनामाच्या गजरात पालखी सोहळा*

मंगळवारी सकाळी ९ वाजता श्री वैद्यनाथ मंदिर येथून संतश्रेष्ठ श्री गुरूलिंग स्वामी महाराजांच्या पालखी सोहळ्याला प्रारंभ झाला. वैद्यनाथ मंदिर, देशमुखपार, अंबेवेस, गणेशपार, नांदूरवेस, गोपनपाळे गल्ली, आंबेवेस, भोई गल्ली मार्गे पालखी बेलवाडी येथे पोहोचली. पालखी मार्गावर जागोजागी भाविकांनी श्रींचे दर्शन घेतले आणि पालखीवर पुष्पवृष्टी केली. ‘ॐ नमः शिवाय’, ‘मन्मथस्वामी महाराज की जय’ आणि ‘गुरूलिंग स्वामी महाराज की जय’ अशा जयघोषाने शहरातील वातावरण भक्तिमय झाले होते.

*सात दिवस अखंड शिवनामाचा गजर*

मागील सात दिवसांपासून बेलवाडी मंदिर परिसरात अखंड शिवनाम सप्ताहासह विविध धार्मिक कार्यक्रमांचे आयोजन करण्यात आले होते. पारायण प्रमुख म्हणून श्री दयानंद चौधरी होते. दररोज आरती, शिवनाम जप, धार्मिक प्रवचन आणि महाप्रसादाचा कार्यक्रम सुरू होता. मंगळवारी पालखी बेलवाडी येथे पोहोचल्यानंतर प्रवचन, आरती व महाप्रसादाने महोत्सवाची सांगता झाली. या पालखी सोहळ्यात वीरशैव लिंगायत समाजातील महिला-पुरुषांसह शहरातील शिवभक्त व भाविक मोठ्या संख्येने सहभागी झाले. पालखी सोहळ्यामुळे परळी शहरातील प्रमुख मार्गांवर भक्तिमय आणि उत्साहाचे वातावरण निर्माण झाले होते.

कार्यक्रमाच्या यशस्वीतेसाठी गुरूलिंग स्वामी देवस्थानचे अध्यक्ष दत्ताप्पा ईटके गुरूजी, सचिव अॅड. गिरीषअप्पा चौधरी, प्रा. रामलिंगप्पा काटकर, सोमनाथअप्पा हालगे, विजयकुमार मेनकुदळे, शिवकुमारअप्पा व्यवहारे, शंकरअप्पा उदरगीरकर, शिवशंकरअप्पा निर्मळे, अक्षय मेनकुदळे, अॅड. मंदार नरवणे, सौ. मीरा धनंजय कोरे, चंद्रकांतअप्पा उदगीरकर यांच्यासह समस्त वीरशैव लिंगायत समाजबांधव व भगिनींनी परिश्रम घेतले.

लालपरी' प्रवाशांचा जीव टांगणीला! हेड लाइट बंद, बॅटरीच्या उजेडात बस २० किलोमीटर धावली.

आष्टी (प्रतिनिधी) आष्टी ते सावरगाव अशी धावणारी बस शुक्रवारी रात्री सात वाजेनंतर चक्क बॅटरीच्या उजेडात २० किलोमीटर धावली. रात्रीच्या अंधारात धोकादायक रीतीने हा प्रवास करण्यात आला. प्रवाशांनीही जीव मुठीत धरूनच सावरगावपर्यंत प्रवास केला. या प्रकारामुळे आष्टी आगाराच्या बसेस आणि कार्यक्षमता यावर प्रश्नचिन्ह उभे राहिले आहे.

याबाबतची प्रवाशांकडून मिळालेली माहिती अशी की, सावरगावला मुक्कामी निघालेली एसटी बस (एमएच २० बीएल २०५५) कडा येथून सायंकाळी ६ वाजता निघाली. साबलखेड, धानोरा, पिंपरखेड, हिवरा मार्गे बस सुलेमान देवळा येथे पोहोचली. तेथे अंधार पडल्याने चालकाने बसचे मुख्य हेडलाइट लावले मात्र तांत्रिक बिघाडामुळे बसचे लाइट न लागल्याने काही वेळ बस तिथेच थांबली. या परिस्थितीत भर रस्त्यात अंधारात बस उभी ठेवण्याऐवजी चालकाने बसमध्ये असलेल्या बॅटरीवर गाडी पुढे नेण्याची तयारी केली. काही प्रवाशांनीही नेहमीचाच रस्ता आहे, असे सांगत बॅटरीच्या उजेडात बस नेण्यास संमती दर्शविली. 

वाहकाने धरली बॅटरी
त्यानंतर वाहकाने चालकाच्या शेजारी उभे राहात रस्त्याच्या दिशेने प्रकाश जाईल, अशा पद्धतीने बॅटरी धरली. बस चालविताना चालकाची कसरत झाली. चालकाने नेहमीच्या वेगापेक्षा कमी वेग ठेवत म्हसोबाची वाडी, गहूखेल, तागडखेल, वेलतुरी आणि गंगादेवी मार्गे साडेसात वाजता सावरगाव येथे बस पोहोचविली. दहा प्रवाशांनी गावी पोहोचल्यावर सुटकेचा निश्वास टाकला.

नियमित तपासणी नाही का?

दरम्यान, या प्रकारामुळे रात्रीच्या वेळी धावणाऱ्या बसेसच्या दिव्यांची तपासणी केली जात नाही का, असा सवाल उपस्थित होत आहे. यापुढे नादुरुस्त गाड्या मुक्कामी न पाठवता सुस्थितीतील बस द्याव्यात, अशी मागणी कडा येथील सामाजिक कार्यकर्ते अमोल साळवे यांनी केली आहे.

माहिती घेतो...
बस बॅटरीच्या उजेडात चालल्यासंदर्भात चालक आणि संबंधित कर्मचाऱ्यांकडे चौकशी करून योग्य ती माहिती घेतो.
- अनिल निकाळजे, आगार प्रमुख, आष्टी

English

हिंदी सारांश

Web Title : Headlights off, 'Lalpari' runs 20 km on battery light; passengers terrified!

Web Summary : An ST bus ran 20 km in darkness using only battery light after its headlights failed. Passengers held their breath during the dangerous journey from Ashti to Savargaon. This incident raises serious questions about the maintenance and operational efficiency of the Ashti depot's buses.

परळीत संत गुरूलिंग स्वामी पुण्यतिथी महोत्सवास भव्य सुरुवात भाविकांची लक्षणीय उपस्थिती.

परळी वैजनाथ (प्रतिनिधी) वीरशैव समाज परळीच्या वतीने संतश्री गुरूलिंग स्वामी यांचा 125 वा पुण्यतिथी महोत्सव आणि अखंड शिवनाम सप्ताह मंगळवार दिनांक 15 सप्टेंबर पासून  भाविक भक्तांच्या मोठ्या उपस्थितीत उत्साहात सुरू झाला आहे. मंगळवार दिनांक 22 सप्टेंबर रोजी  श्री सदगुरू 108 सिद्धचैतन्य शिवाचार्य महाराज साखरखेर्डेकर यांच्या  आशीर्वाचनाने कार्यक्रमाची सांगता होणार आहे. 

कार्यक्रमाच्या  प्रारंभात श्री संतश्री गुरूलिंग स्वामी व सद्गुरु श्री 108 सिद्धलिंग शिवाचार्य महाराज यांच्या प्रतिमांचे विधीवत पूजन  दैनिक महाराष्ट्र टाइम्स छत्रपती संभाजीनगर आवृत्तीचे उपसंपादक श्री व सौ आशिष शंकरअप्पा चौधरी तसेच परळी न्यायालयातील वरिष्ठ लिपिक श्री व सौ अविनाश शंकरअप्पा चौधरी यांच्या हस्ते करण्यात आले.

कार्यक्रमास भाविकांची मोठी गर्दी झाली असून, प्रत्येक वर्षीप्रमाणे यावर्षीसुद्धा अखंड शिवनाम सप्ताह, पालखी सोहळा, भंडारा अशा पारंपारिक कार्यक्रमांचे आयोजन करण्यात आले आहे. हे सर्व कार्यक्रम 22 सप्टेंबरपर्यंत आयोजित केले जातील. श्री सदगुरू 108 सिद्ध चैतन्य शिवाचार्य महाराज साखरखेर्डेकर यांच्या उपस्थितीत दत्ताप्पा ईटके गुरूजी व समस्त विश्वस्त मंडळाच्या अध्यक्षतेखाली हा महोत्सव उत्साहपूर्ण वातावरणात होत आहे.

सप्ताहात विविध धार्मिक कार्यक्रमांचे आयोजन करण्यात आले आहे. सकाळी 7 ते 8 वाजता शिव सहस्त्रनामावली, सकाळी 9 ते 11 वाजता परम रहस्य व श्री पलसिद्ध महात्म्याचे पारायण, सकाळी 10.30 ते 12 वाजता श्री मन्मथ स्वामी गाथावरील भजन, दुपारी 3 ते 5 वाजता शिव पाठ आरती व सायंकाळी 5.30 ते 6.30 वाजता धार्मिक विधींचे आयोजन करण्यात आले आहे. परम रहस्याचे पारायण प्रमुख शि.भ.प. श्री दयानंद अण्णा चौधरी हे करीत आहेत.

परळी उपजिल्हा रुग्णालयात ५७ वर्षीय महिलेची लूट.एक्स-रे काढताना सोन्याचे दागिने गायब.

परळी वैजनाथ (प्रतिनिधी) आजारपणावर उपचारासाठी रुग्णालयात आलेल्या एका रुग्णाच्या हतबलतेचा गैरफायदा घेत चोरट्याने हातसाफ केल्याचा संतापजनक प्रकार परळी उपजिल्हा रुग्णालयात उघडकीस आला आहे. हाताचा एक्स-रे काढण्यासाठी आलेल्या ५७ वर्षीय महिलेच्या पर्समधून तब्बल ६७ हजार २०० रुपये किमतीचे सोन्याचे दागिने अज्ञात भामट्याने लंपास केले. ही घटना १० ऑगस्ट रोजी सकाळी घडली असून, तब्बल महिनाभरानंतर १६ सप्टेंबर रोजी संभाजीनगर पोलिस ठाण्यात गुन्हा दाखल करण्यात आला आहे.

निर्मला शंकर चव्हाण (वय ५७, मूळ रा. सायखेडा, ता. सोनपेठ, सध्या रा. साईनगर, परळी) या हात दुखत असल्याने उपचारासाठी परळी उपजिल्हा रुग्णालयात आल्या होत्या. डॉक्टरांनी एक्स-रे काढण्याचा सल्ला दिल्याने त्यांनी सुरक्षेचा उपाय म्हणून गळ्यातील सोन्याचे सरपाळे, कानातील फुलझोड, कानातील साखळी-जोड आणि सोन्याचे मंगळसूत्र काढून स्वतःच्या पर्समध्ये सुरक्षित ठेवले होते. मात्र, तपासणीच्या गडबडीत अज्ञात चोरट्याने ती पर्सच लांबवली.

पर्स चोरीला गेल्याचे लक्षात येताच महिलेला धक्का बसला. पर्समध्ये ६७ हजार २०० रुपयांचे सोन्याचे दागिने होते. घटनेनंतर महिला गंभीर आजारी असल्याने त्यांना तातडीने पोलिसांत धाव घेता आली नाही. प्रकृतीत सुधारणा झाल्यानंतर त्यांनी दिलेल्या फिर्यादीवरून संभाजीनगर पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे. रुग्णालयासारख्या संवेदनशील ठिकाणी झालेल्या या चोरीमुळे रुग्णांच्या सुरक्षेचा प्रश्न ऐरणीवर आला असून, प्रभारी पोलिस निरीक्षक अनमोल केदार यांच्या मार्गदर्शनाखाली सहाय्यक फौजदार बाळासाहेब चव्हाण पुढील तपास करत आहेत.

महावितरणच्या भोंगळा.निष्काळजी कारभारामुळे निष्पाप शेतकऱ्याचा बळी.

केज (प्रतिनिधी) : महावितरणच्या भोंगळ आणि निष्काळजी कारभारामुळे केज तालुक्यातील जीवाचीवाडी शिवारात आणखी एका निष्पाप शेतकऱ्याचा नाहक बळी गेला आहे. खातेदरा वस्ती येथे घराबाहेरील उघड्या विद्युत तारेचा जोरदार धक्का लागल्याने रामकिशन उर्फ अण्णा लक्ष्मण चौरे यांचा जागीच मृत्यू झाला. बुधवारी (दि. १६) सकाळी सातच्या सुमारास ही धक्कादायक घटना उघडकीस आली. धक्कादायक बाब म्हणजे, अवघ्या १५ दिवसांपूर्वीच याच गावात विजेच्या धक्क्याने एका २२ वर्षीय तरुणाचा मृत्यू झाला होता.

गणेशोत्सवाचा कार्यक्रम संपवून घरी गेले अन्...
मिळालेल्या माहितीनुसार, रामकिशन चौरे हे मंगळवारी रात्री उशिरा १२.३० वाजेपर्यंत गावातील सार्वजनिक गणेश मंडळाच्या कार्यक्रमात सहभागी झाले होते. कार्यक्रम संपवून ते जीवाचीवाडी शिवारातील खातेदरा वस्तीवरील आपल्या घरी परतले. यावेळी अंधारात त्यांचा अचानक उघड्या विजेच्या तारेला स्पर्श झाला. विजेचा जोरदार धक्का बसल्याने ते जागीच कोसळले. सकाळी ७ वाजण्याच्या सुमारास ही घटना कुटुंबीयांच्या लक्षात आली. त्यांना तातडीने विडा येथील प्राथमिक आरोग्य केंद्रात दाखल करण्यात आले; मात्र वैद्यकीय अधिकाऱ्यांनी तपासून मृत घोषित केले. शवविच्छेदनादरम्यान त्यांच्या डाव्या हाताच्या तळव्याला विजेचा तीव्र धक्का बसल्याचे निष्पन्न झाले, अशी माहिती वैद्यकीय अधिकारी डॉ. अभिषेक थोरात यांनी दिली. त्यांच्या पश्चात आई, वडील, पत्नी, दोन भाऊ, दोन विवाहित बहिणी, दोन मुले आणि एक मुलगी असा परिवार आहे.

१५ दिवसांत गावात दुसरा बळी; महावितरण कधी सुधारणार?
२८ ऑगस्टची दुर्घटना : श्रावण महिन्यात नारदस्वामी मंदिरात गंगेचे पाणी अर्पण करण्यासाठी गेलेल्या युवराज आसाराम चौरे (वय २२ वर्षे) या भाविकाचा तुटलेल्या उघड्या वायरचा धक्का लागून जागीच मृत्यू झाला होता.
१६ सप्टेंबरची घटना : या घटनेला अवघे १५ दिवस उलटत नाहीत तोच रामकिशन चौरे यांचा विजेच्या धक्क्याने मृत्यू झाला.

परळीत पिसाळलेल्या.कुत्र्यांचे नागरीकांना वर हल्ले.दिवसभरात ४७ जणांना चावा, नागरिकांत दहशत.

परळी वैजनाथ (प्रतिनिधी) : परळी शहरात मोकाट आणि पिसाळलेल्या कुत्र्यांनी बुधवारी अक्षरशः हैदोस घातला. शहरातील प्रमुख रस्ते, गल्लीबोळ आणि अगदी सरकारी रुग्णालयात घुसून मोकाट कुत्र्यांनी दिवसभरात तब्बल ४७ नागरिकांचे लचके तोडले. जखमींमध्ये लहान मुले, महिला, शाळकरी विद्यार्थी आणि ज्येष्ठ नागरिकांचा समावेश आहे. या भीषण घटनेमुळे शहरभरात प्रचंड भीतीचे वातावरण पसरले असून नगर परिषदेच्या कारभारावर नागरिकांमधून तीव्र संताप व्यक्त होत आहे.

वैद्यनाथ मंदिर रोड, भोईगल्ली, ४० फुटी रोड, बरकत नगर, साठे नगर, आंबेवेस, जमजम पार्क, आझाद नगर आणि गणेशपार या भागांत कुत्र्यांनी नागरिकांवर अचानक हल्ले केले. विशेष म्हणजे, गणेशपार येथील नागरी रुग्णालयात थेट आत घुसून एका पिसाळलेल्या कुत्र्याने तेथील कर्मचाऱ्याला चावा घेतला. जखमी झालेल्या नागरिकांनुसार, एका सोनेरी (गोल्डन) रंगाच्या आणि वैजनाथ मंदिर भागात एका काळ्या रंगाच्या मोकाट कुत्र्याने सर्वाधिक हल्ले केले.

१९ गंभीर जखमी अंबाजोगाईला रेफर
हल्ल्यानंतर परळी उपजिल्हा रुग्णालयात एकाच वेळी ४६ जखमी दाखल झाल्याने धावपळ उडाली. यातील २७ जणांवर प्राथमिक उपचार करून त्यांना घरी सोडण्यात आले, तर गंभीर जखमी झालेल्या १९ जणांना पुढील उपचारांसाठी अंबाजोगाई येथील स्वामी रामानंद तीर्थ वैद्यकीय महाविद्यालयात हलवण्यात आले आहे, अशी माहिती उपजिल्हा रुग्णालयाचे वैद्यकीय अधीक्षक डॉ. अरुण गुट्टे यांनी दिली.

परळी शहरात तब्बल ६ हजार मोकाट कुत्रे असल्याचा अंदाज आहे. अवघ्या दोन महिन्यांपूर्वी नगर परिषदेने शहरात निर्बीजीकरण मोहीम राबवली होती. तरीही शहरात मोकाट कुत्र्यांची संख्या आणि हल्ले वाढल्याने 'ती मोहीम केवळ कागदावरच होती का?' असा सवाल नागरिक करत आहेत. तरी मुख्याधिकारी त्रिंबक कांबळे यांनी तातडीने बंदोबस्त करण्याची मागणी होत आहे. दरम्यान, उपमुख्याधिकारी संतोष रोडे यांनी संबंधित श्वानांचा शोध सुरू असल्याचे सांगत दोन दिवसांत विशेष मोहीम हाती घेतली जाईल असे स्पष्ट केले. नगराध्यक्षा यांनीही तातडीने निर्बीजीकरण मोहीम नव्याने सुरू करण्याचे आदेश दिले असून पाळीव कुत्र्यांची नोंदणी व लसीकरण करण्याचे आवाहन केले आहे.

नशामुक्त भारत अभियानाला मिळणार नवी गती.DJJSच्या ‘बोध–नशा उन्मूलन कार्यक्रम’चा केंद्र सरकारसोबत दोन वर्षांचा सामंजस्य करार.

*नशेच्या दुष्परिणामांविषयी जनजागृती, युवकांना सकारात्मक जीवनशैलीची प्रेरणा आणि नशामुक्त समाजनिर्मितीचा संकल्प. 

परळी वैजनाथ (प्रतिनिधी) नशेच्या वाढत्या समस्येविरोधात जनजागृती आणि नशामुक्त समाजनिर्मितीच्या दिशेने एक महत्त्वपूर्ण पाऊल म्हणून दिव्य ज्योति जाग्रती संस्थान (DJJS) यांच्या ‘बोध–नशा उन्मूलन कार्यक्रम’ या उपक्रमाचा भारत सरकारच्या सामाजिक न्याय व अधिकारिता मंत्रालयासोबत दोन वर्षांचा सामंजस्य करार (MoU) करण्यात आला आहे. हा करार नशामुक्त भारत अभियान (NMBA) अंतर्गत करण्यात आला आहे.

या सामंजस्य करारामुळे नशेच्या दुष्परिणामांविषयी समाजातील विविध घटकांमध्ये व्यापक जनजागृती करण्यास तसेच विशेषतः युवकांना नशेपासून दूर ठेवून सकारात्मक व निरोगी जीवन शैलीकडे वळविण्याच्या प्रयत्नांना अधिक व्यापक स्वरूप मिळणार आहे.

DJJSच्या ‘बोध–नशा उन्मूलन कार्यक्रम’ अंतर्गत जनजागृती अभियान, समुपदेशन, प्रशिक्षण व मार्गदर्शन कार्यक्रम, व्याख्याने तसेच विविध सामाजिक उपक्रमांच्या माध्यमातून नशेच्या दुष्परिणामांविषयी माहिती देण्यात येते. नशेपासून दूर राहण्यासाठी सकारात्मक वातावरण निर्माण करणे आणि समाजातील विविध घटकांना नशामुक्त जीवन जगण्यासाठी प्रेरित करणे हा या उपक्रमाचा प्रमुख उद्देश आहे.

या उपक्रमाच्या माध्यमातून युवक, विद्यार्थी, पालक, शिक्षक तसेच समाजातील विविध घटकांपर्यंत नशामुक्तीचा संदेश पोहोचविण्यावर भर दिला जाणार आहे. नशेच्या आहारी जाण्यापासून युवकांचे संरक्षण करण्यासाठी जनजागृतीसोबतच सकारात्मक विचार, मूल्याधिष्ठित जीवनशैली आणि सामाजिक जबाबदारीची भावना विकसित करण्याचे प्रयत्न केले जाणार आहेत.

यावेळी DJJSच्या साध्वी शिताभा भारती, ग्लोबल कोऑर्डिनेटर, बोध–नशा उन्मूलन कार्यक्रम यांनी नशेची समस्या ही केवळ व्यक्तीपुरती मर्यादित नसून तिचा परिणाम कुटुंब आणि संपूर्ण समाजावर होत असल्याचे नमूद केले. त्यामुळे नशामुक्त समाजनिर्मितीसाठी शासन, सामाजिक संस्था, शैक्षणिक संस्था, पालक आणि नागरिकांनी एकत्रितपणे प्रयत्न करण्याची गरज त्यांनी व्यक्त केली.

केंद्र सरकारसोबत झालेल्या या सामंजस्य करारामुळे ‘नशामुक्त युवा – सशक्त समाज – विकसित भारत’ या उद्दिष्टाला अधिक बळ मिळणार असून, नशामुक्त भारताच्या निर्मितीसाठी DJJSच्या जनजागृती उपक्रमांना व्यापक व्यासपीठ उपलब्ध होणार आहे.

लातूर जिल्ह्यातही जनजागृतीला चालना

या राष्ट्रीय स्तरावरील उपक्रमाच्या पार्श्वभूमीवर लातूर जिल्ह्यातील युवक, विद्यार्थी व नागरिकांमध्ये नशाविरोधी जनजागृती अधिक प्रभावीपणे पोहोचविण्यासाठी DJJS लातूर–अंबाजोगाई शाखेच्या माध्यमातून विविध उपक्रम राबविण्याच्या दृष्टीने प्रयत्नांना अधिक गती मिळणार आहे. नशामुक्त आणि सुदृढ समाजनिर्मितीसाठी नागरिकांनी या अभियानात सक्रिय सहभाग नोंदवावा, असे आवाहन साध्वी सुश्री अन्नपूर्णा भारती जी यांनी केले आहे.

धक्कादायक घटना! शेतातील झाडाला गळफास लावून शेतकऱ्याने संपवले जीवन.

कडा (प्रतिनिधी) : आष्टी तालुक्यातील कडा परिसरातील शेरी शिवारात सोमवारी सायंकाळच्या सुमारास एका ५३ वर्षीय शेतकऱ्याने स्वतःच्या शेतातील लिंबाच्या झाडाला गळफास घेऊन आत्महत्या केल्याची धक्कादायक घटना समोर आली आहे. तांबोळी हाजी मुस्ताक नूर मोहम्मद (वय ५३ वर्षे, रा. कडा) असे मयत शेतकऱ्याचे नाव आहे.

शेतात आढळला मृतदेह

मिळालेल्या माहितीनुसार, तांबोळी हाजी मुस्ताक हे सोमवारी सायंकाळी शेरी येथील आपल्या शेतात गेले होते. तेथे त्यांनी लिंबाच्या झाडाला गळफास लावून जीवन संपवले. ही घटना निदर्शनास येताच परिसरात मोठी खळबळ उडाली. या आत्महत्येमागील नेमके कारण अद्याप स्पष्ट झालेले नाही.

पोलिसांकडून पंचनामा; शवविच्छेदनासाठी मृतदेह रुग्णालयात
घटनेची माहिती मिळताच कडा पोलीस चौकीचे पोलीस हवालदार नंदकिशोर सवासे, प्रभाकर खोले आणि अमोल नवले यांनी तातडीने घटनास्थळी धाव घेतली. पोलिसांनी पंचनामा करून मृतदेह शवविच्छेदनासाठी कडा येथील प्राथमिक आरोग्य केंद्रात दाखल केला आहे. या प्रकरणाचा पुढील तपास कडा पोलीस करत आहेत.

शेगाव-पंढरपूर महामार्गावर थरार.रिक्षा अंगावर उलटल्याने २२ वर्षीय शेतकऱ्याचा जागीच मृत्यू.

केज (प्रतिनिधी) : शेगाव-पंढरपूर राष्ट्रीय महामार्गावरील माळेगाव (ता. केज) शिवारात रविवारी सायंकाळी घडलेल्या एका भीषण अपघातात २२ वर्षीय तरुण शेतकऱ्याचा जागीच मृत्यू झाला. कडबा कुटी घेऊन जाणाऱ्या रिक्षाचालकाचा वाहनावरील ताबा सुटल्याने रिक्षा दुभाजकावर (डिव्हायडर) आदळून थेट अंगावर उलटल्याने हा दुर्दैवी अपघात घडला. उमेश फुलचंद भैरट (वय २२ वर्षे, रा. उमरी, ता. केज) असे अपघातात ठार झालेल्या तरुणाचे नाव आहे.

कळंबहून गावी जाताना काळाचा घाला
मिळालेल्या माहितीनुसार, उमरी येथील रहिवासी असलेले उमेश भैरट हे शेतातील जनावरांसाठी कडबा कुटी आणण्याकरिता भाड्याने रिक्षा घेऊन कळंब येथे गेले होते. रविवारी सायंकाळी सुमारे पाच वाजण्याच्या सुमारास ते कडबा कुटी भरून रिक्षातून आपल्या उमरी गावाकडे परत येत होते. माळेगावजवळ आले असता चालकाचे अचानक वाहनावरील नियंत्रण सुटले. त्यामुळे भरधाव रिक्षा थेट रस्त्यावरील दुभाजकावर जाऊन आदळली आणि जोरदार पलटी झाली. या अपघातात रिक्षामध्ये कडबा कुटीसोबत बसलेले उमेश हे थेट रिक्षाखाली दबले गेले. गंभीर दुखापत झाल्याने त्यांना तातडीने रुग्णालयात नेण्यात आले; मात्र वैद्यकीय अधिकाऱ्यांनी तपासणीअंती त्यांना मृत घोषित केले.

उमरी गावावर शोककळा
सोमवारी दुपारी ३ वाजता उमरी येथे शोकाकुल वातावरणात उमेश यांच्या पार्थिवावर अंत्यसंस्कार करण्यात आले. अवघ्या बाविसाव्या वर्षी उमेशचा असा अपघाती मृत्यू झाल्याने संपूर्ण गावावर शोककळा पसरली आहे. त्यांच्या पश्चात आई, भाऊ आणि बहीण असा परिवार आहे.