पलसिद्ध महास्वामी पीठाच्या सेवाधारी शिवैक्य सौ. शोभा (हेमाताई) विभुते यांना परळीत वीरशैव लिंगायत समाजाची भावपूर्ण श्रद्धांजली.

परळी वैजनाथ (प्रतिनिधी) श्रीमज्जगद्गुरू पलसिद्ध महास्वामी पीठाचे मठाधिपती तथा सद्गुरू ष.ब्र. १०८ श्री सिद्धचैतन्य शिवाचार्य महाराज यांच्या भगिनी, पीठाच्या सेवाधारी आणि सर्वांच्या लाडक्या माय माऊली शिवैक्य सौ. शोभा (हेमाताई) शिवलिंग विभुते (पारडकर) यांचे अल्पशा आजाराने अचानक निधन झाले. त्यांच्या शिवैक्यामुळे वीरशैव लिंगायत समाजासह भक्त परिवारावर दुःखाचा डोंगर कोसळला आहे. त्यांच्या निधनाबद्दल परळी वैजनाथ येथे वीरशैव लिंगायत समाजाच्या वतीने भावपूर्ण श्रद्धांजली अर्पण करण्यात आली.

सद्गुरू सिद्धचैतन्य शिवाचार्य महाराज यांच्या धर्मसंवर्धन, धार्मिक कार्य आणि समाजसेवेच्या प्रदीर्घ प्रवासामागे शोभाताईंचा त्याग, पाठिंबा आणि योगदान अत्यंत मोलाचे होते. सद्गुरूंच्या कार्याला बळ देताना त्यांनी केलेला त्याग आणि दिलेली साथ अनमोल होती. त्या केवळ सद्गुरूंच्या भगिनी नव्हत्या, तर त्यांच्यासाठी आईच्या मायेने आधार देणाऱ्या, प्रत्येक सुख-दुःखात खंबीरपणे पाठीशी उभ्या राहणाऱ्या माय माऊली होत्या.

सद्गुरूंच्या धार्मिक आणि सामाजिक कार्याच्या वाटचालीत शोभाताईंनी दिलेल्या योगदानाचा सिंहाचा वाटा होता. त्यांच्या प्रेमळ स्वभावाने, त्यागी वृत्तीने आणि सेवाभावाने त्यांनी सर्वांच्या मनात आपले वेगळे स्थान निर्माण केले होते. त्यामुळे त्यांचे जाणे ही केवळ एका कुटुंबाची हानी नसून, संपूर्ण वीरशैव लिंगायत समाजासाठी दुःखद घटना आहे.

परळी वैजनाथ येथे वीरशैव लिंगायत समाजाच्या वतीने त्यांना श्रद्धांजली अर्पण करताना त्यांच्या आठवणींना उजाळा देण्यात आला. त्यांच्या त्यागाची, मायेची आणि सेवाभावी जीवनाची स्मृती सदैव समाजाच्या मनात जिवंत राहील, अशा भावना यावेळी व्यक्त करण्यात आल्या.

माय माऊली शोभाताईंचे शिवैक्य म्हणजे प्रेम, त्याग आणि मायेचा एक अध्याय संपला; मात्र सद्गुरूंच्या धर्मसंवर्धन व समाजसेवेच्या कार्यामागील त्यांचे योगदान सदैव स्मरणात राहील.

शिवैक्य सौ. शोभाताई विभुते यांना भावपूर्ण श्रद्धांजली अर्पण करण्यात आली असून त्यांच्या आत्म्यास सद्गती लाभो, हीच ईश्वरचरणी प्रार्थना करण्यात आली.

केंद्रीय मंत्री नितीन गडकरी यांच्याशी परळीचे सुपुत्र आयएएस किरण गित्ते यांची विशेष चर्चा; राष्ट्रीय महामार्ग परिषदेत भूमिकेचे कौतुक.

परळी वैजनाथ  (प्रतिनिधी): गुजरात येथील एकता नगर (केवडिया) स्थित टेंट सिटी २ मध्ये केंद्रीय रस्ते वाहतूक आणि महामार्ग मंत्रालयाकडून आयोजित दोन दिवशीय 'चिंतन शिबीर २०२६' या राष्ट्रीय महामार्ग परिषदेत परळीचे भूमिपुत्र तथा त्रिपुरा सरकारमधील सचिव व वरिष्ठ आयएएस अधिकारी श्री. किरण गित्ते साहेब यांनी सक्रिय सहभाग नोंदवत आपल्या कर्तृत्वाचा ठसा उमटवला आहे. परिषदेदरम्यान त्यांनी केंद्रीय रस्ते वाहतूक आणि महामार्ग मंत्री नितीन गडकरी यांची भेट घेऊन ईशान्य भारतातील रस्ते विकास, आधुनिक पायाभूत सुविधा आणि तंत्रज्ञानाचा प्रभावी वापर यावर महत्त्वपूर्ण व सकारात्मक चर्चा केली. "गतिशक्ती से प्रगति" या ब्रिदवाक्याखाली आयोजित या राष्ट्रीय परिषदेत देशभरातील विविध राज्यांचे मंत्री, वरिष्ठ सनदी अधिकारी आणि क्षेत्रातील तज्ज्ञ सहभागी झाले होते. त्रिपुरा शासनात सचिव पदावर कार्यरत असणारे आणि प्रशासकीय व विकासकामांचा मोठा अनुभव असणारे ज्येष्ठ सनदी अधिकारी किरण गित्ते साहेब यांनी या शिबीरात पीएम गतिशक्ती अंतर्गत एकात्मिक नियोजन, भूमी अधिग्रहण प्रक्रिया सुलभ करणे आणि अपघातमुक्त सुरक्षित महामार्गांची निर्मिती या विषयांवर अभ्यासपूर्ण विचार मांडले. केंद्रीय मंत्री नितीन गडकरी यांनीही श्री. गित्ते यांच्याकडून प्रत्यक्ष क्षेत्रातील अनुभव जाणून घेत या चर्चेचे स्वागत केले. राष्ट्रीय पातळीवरील या उच्चस्तरीय परिषदेत परळीच्या सुपुत्राने नोंदवलेल्या या प्रभावी सहभागाबद्दल आणि देशपातळीवर बजावलेल्या भूमिकेबद्दल परळी शहर व परिसरातून त्यांच्यावर कौतुकाचा वर्षाव होत आहे.

संत एकनाथांच्या भागवतातून अध्यात्म आणि संसाराचा सुंदर समन्वय -ह.भ.प. प्रवीण महाराज गोसावी.

*मुक्ताई लॉन्स येथे एकनाथी भागवत कथा प्रवचन  सोहळ्याचा भाविकांना लाभ. 

परळी वैजनाथ (प्रतिनिधी) शांतिब्रह्म संत एकनाथ महाराजांचे एकनाथी भागवत हे केवळ पद्याचे गद्यात रूपांतर नसून, नाथांच्या जीवनदृष्टीशी एकरूप झालेल्या अधिकारी संताचे चिंतन आणि निरूपण आहे. संत एकनाथ महाराजांनी आपल्या वाणीच्या माध्यमातून संतवाङ्मय आणि सामान्य भाविक यांच्यातील काळाचे व भाषेचे अंतर कमी करून भक्तीचा मार्ग अधिक सुगम केला. त्यांच्या जीवनातून संसारात राहूनही परमार्थ साधता येतो आणि परमात्मवृत्तीने संसाराचे कर्तव्य पार पाडता येते, याचा आदर्श समाजासमोर ठेवला, असे प्रतिपादन ह.भ.प. प्रवीण महाराज गोसावी यांनी केले.

भास्करमामा चाटे व परिवाराच्या वतीने परळी-बीड रोडवरील मुक्ताई लॉन्स येथे मातृ-पितृ स्मरणार्थ आयोजित एकनाथी भागवत कथा प्रवचन  सोहळ्यात ते बोलत होते. संत एकनाथ महाराजांचे ते १३ वे वंशज आहेत.या धार्मिक सप्ताहाचे आयोजन ३ ते ९ ऑक्टोबर २०२६ या कालावधीत करण्यात आले आहे. तुकाराम गाथा पारायण, एकनाथी भागवत कथा, संतवाङ्मय, हरिनाम, प्रवचन आणि कीर्तनांच्या माध्यमातून भाविकांना अध्यात्मिक चिंतनाची पर्वणी मिळत आहे. यावेळी संत एकनाथ महाराजांनी समाजाला केवळ भक्तीचा उपदेश केला नाही, तर माणसाच्या अंतःकरणातील देवत्व ओळखण्याची दृष्टी दिली. त्यांच्या भागवत निरूपणामुळे संतांची वाणी सामान्य माणसाच्या अधिक जवळ आली असून, आजही त्यांच्या विचारांमधून जीवन जगण्याची दिशा मिळते, असेही प्रवीण महाराज गोसावी यांनी नमूद केले.भाविकांनी या अध्यात्मिक कार्यक्रमांस मोठ्या संख्येने उपस्थित राहून संतवाङ्मय, हरिनाम श्रवणाचा लाभ घेतला. दरम्यान आजच्या प्रवचन श्रवणास शिवसेना (शिंदे) जेष्ठ नेते प्रा. टि.पी.मुंडे यांची प्रमुख उपस्थिती लाभली.या कार्यक्रमास विविध क्षेत्रातील मान्यवरांनी उपस्थिती लावली. कार्यक्रमाच्या यशस्वीतेसाठी आयोजक सौ. शोभाताई व श्री. भास्करराव चाटे (मामा), निळकंठ चाटे, दिनकर चाटे,सौ. स्मिता व ऍड गिरीशराव मुरकुटे,सौ. अर्चना व श्री. श्रीकांत चाटे, सौ. वैशाली व श्री. शशिकांत चाटे तसेच डॉ. सौ. गौरी उर्फ स्वप्ना व श्री. रविकांत चाटे व संपूर्ण चाटे परिवार परिश्रम घेत आहे.

परळीच्या वाण धरणावर २४ तास खडा पहारा; अवैध पाणी उपसा रोखण्यासाठी प्रशासनाची विशेष पथके तैनात.

परळी वैजनाथ (प्रतिनिधी): चालू खरीप हंगामात पर्जन्यमानाने ओढ दिल्याने मराठवाड्यात दुष्काळाची भीषण परिस्थिती निर्माण झाली आहे. या पार्श्वभूमीवर उन्हाळ्यात आणि भविष्यात उद्भवणाऱ्या संभाव्य पाणीटंचाईची तीव्रता लक्षात घेऊन प्रशासनाने जलस्रोतांच्या संरक्षणासाठी अत्यंत आक्रमक पाऊल उचलले आहे. तालुक्यातील वाण धरण (नागापूर) येथील पाणीसाठ्यातून होणारा अनधिकृत व अवैध पाणी उपसा रोखण्यासाठी धरणावर २४ तास खडा पहारा ठेवण्याचा धोरणात्मक निर्णय परळी तालुका आपत्ती व्यवस्थापन समितीने घेतला आहे. यासंदर्भातील अधिकृत आदेश ५ ऑक्टोबर रोजी जारी करण्यात आले असून, मंगळवार (दि. ६) पासून प्रत्यक्ष अंमलबजावणीला सुरुवात झाली आहे.

दोन पाळ्यांमध्ये २४ तास चोख नजर
परळी तालुका आपत्ती व्यवस्थापन समितीचे अध्यक्ष तथा तहसीलदार विनोद रनवरे यांनी दिलेल्या आदेशानुसार, ६ ऑक्टोबरपासून धरण परिसरात दोन स्वतंत्र पाळ्यांमध्ये २४ तास तपासणी आणि नियंत्रण ठेवले जाणार आहे:
पहिली पाळी: सकाळी ८:०० ते रात्री ८:०० वाजेपर्यंत
दुसरी पाळी: रात्री ८:०० ते सकाळी ८:०० वाजेपर्यंत

या दोन्ही पाळ्यांमध्ये धरणातील पाण्यावर नजर ठेवण्यासाठी बहुविभागीय संयुक्त विशेष पथके तैनात करण्यात आली आहेत. धरणातील पाणीसाठ्यातून कोणत्याही व्यक्तीने, कारखान्याने अथवा संस्थेने अनधिकृतपणे मोटारी किंवा पाईपलाईन टाकून पाणी उपसू नये, यासाठी ही पथके सातत्याने गस्त घालणार आहेत.

संयुक्त पथकात विविध विभागांच्या कर्मचाऱ्यांचा समावेश

धरणाचे संरक्षण आणि पाण्याचा थेंबन्‌थेंब वाचवण्यासाठी विविध विभागांचे अधिकारी व कर्मचारी या मोहिमेत एकत्र आले आहेत. नियुक्त करण्यात आलेल्या विशेष नियंत्रण पथकांमध्ये खालील यंत्रणांचा समावेश आहे: तलाठी व महसूल सेवक (ग्रामस्तरीय महसूल प्रशासन), ग्रामपंचायत अधिकारी व ग्रामसेवक, परळी नगरपालिका कर्मचारी, महावितरणचे (MSEDCL) तांत्रिक कर्मचारी (अवैध वीजजोडण्या तोडण्यासाठी), लघु पाटबंधारे विभागाचे क्षेत्रीय कर्मचारी, परळी पोलीस कर्मचारी व स्थानिक पोलीस पाटील

हलगर्जीपणा आढळल्यास कर्मचाऱ्यांवरही कारवाईची कुऱ्हाड
या आदेशाची अंमलबजावणी केवळ कागदावर न राहता प्रत्यक्ष जमिनीवर व्हावी, यासाठी तहसीलदार विनोद रनवरे यांनी कडक निर्देश दिले आहेत.

नैसर्गिक आपत्ती कायद्यानुसार कारवाई 

"धरणावर नेमण्यात आलेल्या कोणत्याही अधिकारी किंवा कर्मचाऱ्याने कर्तव्यात कसूर, गैरहजेरी किंवा हलगर्जीपणा दाखवल्यास त्यांची गय केली जाणार नाही. संबंधितांवर नैसर्गिक आपत्ती व्यवस्थापन कायद्यान्वये तात्काळ शिस्तभंगाची कठोर कारवाई केली जाईल. उपलब्ध जलसाठा हा परळीकरांच्या पिण्याच्या पाण्यासाठी आणि आवश्यक गरजांसाठी अतिशय मोलाचा आहे; त्यामुळे पाण्याचा एक थेंबही बेकायदेशीरपणे उपसू दिला जाणार नाही."
-विनोद रनवरे, तहसीलदार तथा अध्यक्ष, तालुका आपत्ती व्यवस्थापन समिती, परळी वैजनाथ.

अंबाजोगाईत बसस्थानकाजवळ अनैतिक देहव्यापार लॉजवर पोलिसांची धाड.

अंबाजोगाई (प्रतिनिधी) शहरातील बसस्थानकाच्या पाठीमागील जनता लॉजमध्ये पीडित महिलेला बोलावून तिच्याकडून अनैतिक व्यवसाय करून घेतला जात असल्याची माहिती मिळताच सोमवारी दुपारी पोलिसांनी छापा टाकला. या प्रकरणी नारायण व्यंकटराव गुंडे व सचिन जगन्नाथ दुधाणी, (दोघेही रा. प्रशांतनगर, बसस्थानकाच्या पाठीमागे, अंबाजोगाई) यांच्यावर अनैतिक व्यापार प्रतिबंधक नुसार गुन्हा दाखल करण्यात आला आहे. या छाप्यात २७ हजार ९०० रुपयांची रोकड, दोन मोबाईल जप्त करण्यात आले आहेत.

शहरातील जनता लॉजमध्ये अनैतिक व्यवसाय सुरू असल्याची माहिती मिळताच पोलिसांनी सोमवारी सायंकाळी ५.५० वाजता छापा मारून एका महिलेकडून व आरोपींकडून रोकड व इतर साहित्य जप्त केले. सचिन दुधाणी याच्या ताब्यातून ५ हजार ५०० रुपये रोकड व १० हजार रुपये किमतीचा जुना मोबाईल, तर पीडित महिलेच्या ताब्यातून १२ हजार ४०० रुपये व १० हजार रुपये किमतीचा जुना मोबाईल जप्त करण्यात आले. असा एकूण २७ हजार ९०० रुपये असल्याचे पोलिसांनी नमूद केले आहे. या प्रकरणी मीरा महादेव रेडेकर यांच्या फिर्यादीवरून अंबाजोगाई शहर पोलिस ठाण्यात अनैतिक व्यापार प्रतिबंधक अधिनियम अन्वये गुन्हा दाखल करण्यात आला आहे. तपास पोलिस उपनिरीक्षक जोगदंड करीत आहेत

परळीत मोकाट कुत्र्यांचा उच्छाद! ४८ तासांत २३ जणांना घेतला चावा.नागरिकां मध्ये भीतीचे वातावरण.

परळी वैजनाथ (प्रतिनिधी): परळी वैजनाथ शहरात मोकाट व फिरस्त्या श्वानांनी अक्षरशः उच्छाद मांडला असून नागरिकांमध्ये भीतीचे वातावरण पसरले आहे. शहरात गुरुवारी आणि शुक्रवारी अशा अवघ्या दोन दिवसांच्या कालावधीत तब्बल २३ जणांना फिरस्त्या श्वानांनी चावा घेतल्याची धक्कादायक आकडेवारी समोर आली आहे. शुक्रवारी श्वानांनी ८ जणांचे लचके तोडले, ज्यात पेठ मोहल्ला परिसरातील तीन लहान बालकांचा समावेश आहे. तर गुरुवारी पद्मावती गल्लीतील एका शाळकरी विद्यार्थ्यासह विविध भागांतील १४ जणांना लक्ष्य करण्यात आले होते. रस्त्यांवरून ये-जा करताना लहान मुले, महिला आणि वृद्धांना जीव मुठीत धरून फिरावे लागत आहे.

शहरातील गल्लीबोळांत कुत्र्यांचे टोळके वाढत असतानाच परळी नगरपालिकेची श्वान पकडण्याची मोहीम गेल्या दोन दिवसांपासून अचानक थंडावली होती. परिणामी श्वानांचा उपद्रव आणखी वाढला. वाढत्या तक्रारींनंतर शुक्रवारी रात्री आठ वाजेच्या सुमारास नगरपालिका कर्मचारी राज गायकवाड यांनी पेठ मोहल्ला भागातील जखमी व्यक्तीच्या कुटुंबाची भेट घेऊन विचारपूस केली. त्यानंतर राधाकृष्ण सेवाभावी संस्थेच्या मार्गदर्शनाखाली झाशी येथील विशेष कामगारांनी नगरपालिकेचे कर्मचारी राजाभाऊ गायकवाड, दयानंद रोडे आणि सचिन हिके यांच्या सहकार्याने पेठ मोहल्ल्यात दोन आक्रमक श्वानांना पकडले.

नंदागौळ ॲनिमल सेंटरमध्ये ६० श्वान; पिसाळलेल्यांसाठी स्वतंत्र व्यवस्था
पकडण्यात आलेल्या श्वानांना नंदागौळ रोडवरील पालिकेच्या अधिकृत ॲनिमल सेंटरमध्ये हलवण्यात आले आहे. सध्या या केंद्रात सुमारे ६० श्वान असून, नागरिकांच्या सुरक्षेसाठी पिसाळलेल्या किंवा संशयित श्वानांना स्वतंत्र कक्षात ठेवले जात असल्याचे कर्मचाऱ्यांनी स्पष्ट केले. शनिवारपासून (३ ऑक्टोबर २०२६) संपूर्ण शहरात श्वान पकडण्याची मोहीम पुन्हा युद्धपातळीवर राबवली जाईल, अशी माहिती नगरपालिका सूत्रांनी दिली आहे.

परळी उपजिल्हा रुग्णालयात स्वतंत्र उपचार कक्ष सुरू करा 
परळी शहरात एकट्या सप्टेंबर महिन्यातच तब्बल १०० पेक्षा अधिक नागरिकांना श्वानांनी चावा घेतल्याच्या घटनांची नोंद झाली आहे. श्वानदंश झाल्यानंतर गंभीर रुग्णांना पुढील उपचारांसाठी अंबाजोगाई येथील स्वामी रामानंद तीर्थ ग्रामीण शासकीय रुग्णालयात (SRTR) पाठवले जाते. यात लहान मुले आणि वृद्धांचा वेळ, पैसा आणि मानसिक त्रासामुळे प्रचंड हाल होतात.

रेबीज हा अत्यंत प्राणघातक आजार असल्याने वेळेत उपचार मिळणे अत्यावश्यक आहे. या पार्श्वभूमीवर  उपजिल्हा रुग्णालयाचे वैद्यकीय अधीक्षक डॉ. अरुण गुट्टे यांनी रुग्णासाठी परळीतच 'स्वतंत्र श्वानदंश उपचार कक्ष' सुरू करावा आणि सर्व आवश्यक रेबीज प्रतिबंधक लसी व औषधांचा मुबलक साठा उपलब्ध करून द्यावा, अशी आग्रही मागणी होत आहे. 

परळीतील व्यापाऱ्याचे दुकान फोडून दुरुस्तीचे ७० मोबाईल लंपास, व्यापारी वर्गात चिंता. पोलीस दलासह एलसीबी घटनास्थळी.

परळी वैजनाथ (प्रतिनिधी): परळी शहरातील अत्यंत गजबजलेल्या आणि २४ तास वर्दळ असणाऱ्या मध्यवर्ती भागातील सुरक्षेचे धिंडवडे काढणारी एक धाडसी चोरीची घटना समोर आली आहे. राणी लक्ष्मीबाई टॉवर परिसरातील एका राष्ट्रीयकृत बँकेच्या लगतच असलेले 'न्यू आर्यन मोबाईल शॉपी'चे दुकान फोडून अज्ञात चोरट्याने दुरुस्तीसाठी आलेले ७० मोबाईल आणि रोकड लंपास केली आहे. शनिवारी (३ ऑक्टोबर २०२६) पहाटे सव्वादोन वाजेच्या सुमारास ही घटना घडली. भरवस्तीत आणि थेट बँकेच्या शेजारीच दुकानाचा पत्रा उचकटून चोरी झाल्यामुळे शहरातील व्यापारी वर्गात तीव्र घबराट आणि चिंतेचे वातावरण पसरले आहे.

पत्रा उचकटून आत प्रवेश; एकाच चोरट्याने साधला डाव

मिळालेल्या माहितीनुसार, शनिवारच्या पहाटे २:१५ वाजताच्या सुमारास अज्ञात चोरट्याने दुकानाच्या छताचा लोखंडी पत्रा उचकटून आत प्रवेश केला. दुकानात शिरल्यानंतर चोरट्याने दुरुस्तीच्या रॅकवर ठेवलेले ग्राहकांचे मोबाईल आणि रोख रक्कम गोळा करून पळ काढला. ही संपूर्ण घटना दुकानातील सीसीटीव्ही कॅमेऱ्यात स्पष्टपणे कैद झाली असून, फुटेजमध्ये एकच संशयित चोरटा चोरी करताना स्पष्ट दिसत आहे. सकाळी दुकान उघडण्यासाठी आल्यानंतर हा प्रकार उघडकीस आला.

दुरुस्तीचे ७० मोबाईल, १ नवीन फोन अन् ५ हजारांची रोकड चोरीला
मोबाईल दुकानाचे चालक गणेश तोडकरी यांनी परळी येथील संभाजीनगर पोलीस ठाण्यात याप्रकरणी अधिकृत तक्रार दिली आहे. तोडकरी यांनी दिलेल्या प्राथमिक माहितीनुसार, ग्राहकांनी विश्वासाने दुरुस्तीसाठी दिलेले ७० जुने स्मार्टफोन, १ नवीन सीलबंद मोबाईल आणि गल्ल्यातील ५ हजार रुपयांची रोख रक्कम चोरट्याने लंपास केली आहे. याशिवाय इतर साहित्याचीही चोरी झाली असून, चोरीला गेलेल्या एकूण ऐवजाचा निश्चित आर्थिक आकडा संपूर्ण तपासणीनंतर समोर येईल.

पोलीस दलासह एलसीबी घटनास्थळी

घटनेचे गांभीर्य ओळखून संभाजीनगर पोलीस ठाण्याचे प्रभारी पोलीस निरीक्षक अनमोल केदार, पोलीस उपनिरीक्षक नरहरी नागरगोजे, सहायक फौजदार राजाभाऊ थळकरी, अंमलदार चव्हाण आणि डोंगळे यांनी तात्काळ घटनास्थळी धाव घेऊन पंचनामा केला. स्थानिक गुन्हे शाखेचे (LCB) पोलीस उपनिरीक्षक प्रशांत सुतळे, सचिन सानप, सचिन आंधळे, रामचंद्र केकान आणि मारुती कांबळे यांनी घटनास्थळाची पाहणी करून सीसीटीव्ही फुटेज ताब्यात घेतले.

ठसेतज्ज्ञांकडून पुरावे गोळा

चोरीच्या पद्धतीवरून हा सराईत गुन्हेगार असल्याचा संशय असून, बीडवरून आलेल्या श्वानपथक आणि ठसेतज्ज्ञांच्या मदतीने दुकानातून बोटांचे ठसे घेण्यात आले आहेत. शनिवारी सायंकाळी उशिरापर्यंत याप्रकरणी संभाजीनगर पोलीस ठाण्यात गुन्हा दाखल करण्याचे काम सुरू होते.

यशवंतराव चव्हाण कनिष्ठ महाविद्यालय परळीच्या विद्यार्थ्यांची उपजिल्हा रुग्णालयाच्या आयसीटीसी विभागला अभ्यास भेट

परळी वैजनाथ (प्रतिनिधी) 3/10/2026 रोजी वैद्यकीय अधीक्षक डॉ अरुण गुट्टे सर व यशवंतराव चव्हाण कनिष्ठ महाविद्यालयाचे प्राचार्य प्रा.अतुल दुबे  सर यांच्या मार्गदर्शनाखाली यशवंतराव चव्हाण कनिष्ठ महाविद्यालय परळी येथे महाराष्ट्र राज्य एड्स नियंत्रण सोसायटी मुंबई यांच्या वतीने राबवित असलेले रेड रिबीन क्लब च्या विद्यार्थ्यांनी उपजिल्हा रुग्णालय परळी येथे भेट देऊन रुग्णालयातील ओपीडी, अपघात विभाग, ऑपरेशन थेटर  एक्स-रे,  प्रयोगशाळा विभाग, प्रस्तुती कक्ष व आयसीटीसी या विभागाची समुपदेशक श्री शरद चव्हाण यांनी संपूर्ण माहिती दिली त्यात विद्यार्थ्यांना आरोग्याबद्दल मार्गदर्शन करताना एच आय व्ही/ एड्स   होण्यामागची कारणे त्याची लक्षणे व त्यावर उपलब्ध असणारा औषध उपचार , टीबी, , गुप्तरोग, मलेरिया, कॅन्सर या विविध आजाराबद्दल माहिती दिली, पोस्टर प्रदर्शनातूनही माहिती देण्यात आली व एच आय व्ही तपासणी करण्याच्या प्रक्रिया त्याच्या किट संदर्भात सविस्तर माहिती दिली एच आय व्ही वर उपलब्ध असणाऱ्या औषधोपचाराबद्दल ही माहिती देण्यात आली आयसीटीसी विभागामार्फत राबविण्यात येणाऱ्या रेड रिबीन क्लब मार्फत विद्यार्थ्यांकडून आरोग्याची जनजागृती करावी असे आवाहन केले. तसेच एचआयव्ही विषयी शंका आहे का करिता सेल्फ रिस्क असेसमेंट चे किंव आर कोड विद्यार्थ्याकडून स्कॅन करून घेण्यात आले यावेळी वैद्यकीय अधीक्षक डॉ अरुण गुट्टे सर, , मेट्रन यमुना गायकवाड   व कर्मचारी वृंद. तसेच यशवंतराव चव्हाण कनिष्ठ महाविद्यालयाचे प्राचार्य प्रा.अतुल दुबे सर, रेड रिबीन क्लब कार्यक्रम अधिकारी प्रा. पी.पी.तिडके मॅडम, प्रा. ए.डी. शेख, प्रा. एस.के.अप्पार मॅडम यांच्या सह विद्यार्थी उपस्थित होते.

महावितरणचा भोंगळ कारभार: वरोरा येथे उखर्डा गावात नवीन 'स्मार्ट मीटर' जळाले नवीन मीटरसाठी पैसे मागितल्याने ग्राहकाचा तीव्र संताप!

वरोरा (प्रतिनिधी):महावितरण कंपनीकडून काही दिवसांपूर्वीच बसवण्यात आलेले नवीन 'स्मार्ट मीटर' तांत्रिक बिघाडामुळे जळाल्याची घटना उखर्डा (ता. वरोरा, जि. चंद्रपूर) येथे घडली आहे. यामुळे बाधित ग्राहक प्रभाकरराव वामन कुडे यांचे कुटुंब गेल्या ४ दिवसांपासून पूर्णपणे अंधारात दिवस काढत आहे. महावितरणच्या चुकीमुळे आणि उपकरणातील दोषामुळे मीटर जळाले असताना, नवीन मीटर बसवण्यासाठी कंपनीचे अधिकारी पैसे मागून ग्राहकाची अडवणूक करत असल्याचा गंभीर आरोप ग्राहकाने केला आहे.   

काय घडला नेमका प्रकार?

उखर्डा येथील रहिवासी आणि महावितरणचे अधिकृत वीज ग्राहक प्रभाकरराव कुडे (ग्राहक क्र. ४५९०९००००५२४६) यांच्या घरी महावितरणने जुने मीटर काढून नवीन स्मार्ट मीटर बसवले होते. मात्र, बसवल्यानंतर अवघ्या काही दिवसांतच तांत्रिक त्रुटी किंवा व्होल्टेजमधील चढ-उतारामुळे हे मीटर अचानक जळाले. यात ग्राहकाची कोणतीही चूक किंवा फेरफार (Tampering) झालेली नाही.   

कायद्याचा आणि नियमांचा भंग:

महाराष्ट्र विद्युत नियामक आयोग (MERC) नियम २०२० (Standards of Performance) आणि 'विद्युत कायदा २००३' च्या कलम ५५ नुसार, जर तांत्रिक दोषाने किंवा उपकरणातील दोषाने मीटर जळाले असेल, तर ग्राहकाला कोणताही अतिरिक्त खर्च किंवा दंड न लावता त्वरित नवीन मीटर देणे आणि वीज पुरवठा सुरळीत करणे ही परवानाधारक महावितरण कंपनीची कायदेशीर जबाबदारी आहे.   

ग्राहकाची आक्रमक भूमिका - "पैसे भरणार नाही!"

कंपनीच्या निष्काळजीपणामुळे आणि निकृष्ट दर्जाच्या स्मार्ट मीटरमुळे ही समस्या निर्माण झाली असताना, महावितरणचे अधिकारी नवीन मीटरसाठी पैसे भरण्यास सांगत आहेत. "आमची कोणतीही चूक नसताना आम्ही पैसे का भरावे?" असा सवाल करत प्रभाकरराव कुडे यांनी आज सहाय्यक अभियंता / उपकार्यकारी अभियंता, नागरी उपविभाग, महावितरण वरोरा यांना लेखी अर्ज देऊन विनामूल्य नवीन मीटर त्वरित बसवून देण्याची मागणी केली आहे.   

तसेच, जर महावितरणने त्वरित व मोफत वीज पुरवठा पूर्ववत केला नाही, तर MERC कडे तक्रार दाखल करून महावितरणविरोधात तीव्र आंदोलन छेडण्याचा इशाराही ग्राहकाने दिला आहे.

वीज मीटर बदलण्यासाठी महावितरणचा वरिष्ठ तंत्रज्ञ.ला 13 हजारांची लाच, ACBने रंगेहात पकडले.

परळी वैजनाथ (प्रतिनिधी) फॉल्टी वीज मीटर बदलून वीजपुरवठा सुरळीत करून देण्यासाठी १३ हजार रुपयांची लाच स्वीकारताना परळी येथील महावितरणच्या अतिरिक्त कार्यकारी अभियंता कार्यालयाचे वरिष्ठ तंत्रज्ञ अरूण सुरेश गितेला जालना येथील लाचलुचपत प्रतिबंधक विभागाच्या पथकाने रविवारी रंगेहाथ पकडले. परळी शहरातील जिरगेनगर येथील डीपीजवळ रविवारी दुपारी सव्वा एकच्या सुमारास ही कारवाई करण्यात आली.

तक्रारीची पडताळणी करण्यासाठी तक्रारदार पंचासह महावितरणच्या परळी कार्यालयात गेले. परंतु त्या ठिकाणी अरुण गीते हे उपस्थित नव्हते. त्यानंतर तक्रारदारांनी गीते यांच्याशी फोनवरून संपर्क साधला. त्यांनी तक्रारदारास शहरातील माऊलीनगर येथे बोलावून घेतले. त्या ठिकाणी झालेल्या चर्चेदरम्यान गीते यांनी १५ हजार रुपयांची लाच मागितली. तडजोडीनंतर १३ हजार रुपये स्वीकारण्याचे मान्य केले. रविवारी दुपारी १.१० वाजता जिरगेनगर येथील डीपीजवळ तक्रारदाराकडून १३ हजार रुपयांची लाच स्वीकारताना वरिष्ठ तंत्रज्ञ अरुण गीते यांना पथकाने रंगेहाथ पकडले. जालना लाचलुचपत प्रतिबंधक विभागाचे पोलिस उपअधीक्षक बी. एस. जाधवर यांच्या मार्गदर्शनाखाली पोलिस जमादार गजानन घायवट, पोलिस अंमलदार मनोहर भुतेकर, गजानन कांबळे, शिवलिंग खुळे, गणेश चेके, पोलिस नाईक कापसे यांच्या पथकाने ही कारवाई केली.

या प्रकरणी गुन्हा दाखल करण्याची प्रक्रिया रविवारी रात्री सुरू होती. दरम्यान, परळीतील जलालपूर भागात भाड्याने राहत असलेल्या गीते यांच्या घराची झडती लाचलुचपत प्रतिबंधक विभागाचे बीड येथील अधिकारी समाधान कवडे यांच्या पथकाने घेतल्याचे वृत्त आहे.

कुटुंब अखंड हरिनाम सप्ताहाच्या कीर्तनात इकडे चोरट्यांनी घर केले साफ!कपाटातील सोने अन् रोकड लंपास.

आष्टी (प्रतिनिधी): गावात सुरू असलेल्या अखंड हरिनाम सप्ताहाच्या कीर्तनासाठी कुटुंब घराला कुलूप लावून गेले असताना, अज्ञात चोरट्यांनी बंद घराचे दार उचकटून आत प्रवेश करत कपाटातील दीड तोळे सोने आणि ५० हजार रुपयांची रोख रक्कम लंपास केल्याची घटना घडली. ही घरफोडी आष्टी तालुक्यातील सुर्डी येथे बुधवारी रात्री घडली असून, कीर्तन संपवून कुटुंब घरी परतल्यानंतर हा धक्कादायक प्रकार उघडकीस आला.

सप्ताहात कीर्तनाला गेले अन् घडला अनर्थ
सुर्डी येथे सध्या अखंड हरिनाम सप्ताह सुरू आहे. गावातील रहिवासी शेतकरी जालिंदर अर्जुन गर्जे हे बुधवारी रात्री घराला कुलूप लावून सहकुटुंब सप्ताहातील कीर्तन ऐकण्यासाठी गेले होते. घर बंद असल्याची संधी साधत अज्ञात भामट्यांनी घराच्या दरवाजा एका बाजूने उचकटून आत प्रवेश केला. चोरट्यांनी घरातील साहित्याची उचकापाचक करत कपाटात ठेवलेले सुमारे दीड तोळे सोन्याचे दागिने आणि ५० हजार रुपयांची रोकड असा लाखोंचा ऐवज लंपास केला.

कीर्तन संपवून घरी आल्यावर प्रकार उघड
रात्री उशिरा कीर्तन संपल्यानंतर गर्जे कुटुंब घरी परतले असता त्यांना घराचा दरवाजा उघडा आणि सामानाची दाणादाण उडाल्याचे दिसले. कपाटातील दागिने व रोख रक्कम गायब असल्याचे लक्षात येताच त्यांच्या पायाखालची जमीन सरकली. या चोरीच्या घटनेमुळे गावात एकच खळबळ उडाली आहे. या प्रकरणी आष्टी पोलीस ठाण्यात गुन्हा दाखल करण्याची प्रक्रिया सुरू होती.

हिंद नगर-भवानी नगरमधील अवैध दारू विक्री बंद करा.नवीन दारू दुकानास स्थलांतरास परवानगी देऊ नये. नागरिकांचे प्रशासनाला निवेदन - प्रशांत कराड

परळी वैजनाथ (प्रतिनिधी) शहरातील हिंद नगर व भवानी नगर परिसरात सुरू असलेल्या अनधिकृत दारू विक्रीमुळे नागरिकांना मोठ्या त्रासाला सामोरे जावे लागत असल्याने ही अवैध दारू विक्री तातडीने बंद करावी, तसेच परिसरात नवीन दारू दुकानास परवानगी देऊ नये अथवा विद्यमान दुकानाचे स्थलांतर करू नये, अशी मागणी करणारे निवेदन नागरिकांच्या वतीने प्रशासनाला देण्यात आले.

याबाबत मा. पंकजाताई गोपीनाथराव मुंडे, पशुसंवर्धन व पर्यावरण व हवामान बदल मंत्री, जिल्हाधिकारी बीड, पोलीस अधीक्षक बीड आणि अधीक्षक, राज्य उत्पादन शुल्क विभाग बीड यांना निवेदन देण्यात आले. भाजपाचे परळी शहर उपाध्यक्ष प्रशांत केशवराव कराड तसेच हिंद नगर व भवानी नगर परिसरातील नागरिकांच्या स्वाक्षऱ्यांसह हे निवेदन सादर करण्यात आले.

निवेदनात म्हटले आहे की, परिसरात अधिकृत तसेच अनधिकृत दारू विक्रीच्या ठिकाणांमुळे नागरिकांच्या दैनंदिन जीवनावर परिणाम होत आहे. दारू सेवन करून सार्वजनिक ठिकाणी धिंगाणा घालणे, भांडणे, हाणामारी, शिवीगाळ करणे, रस्त्यावर पडून राहणे, नागरिकांच्या घरांसमोर लघुशंका करणे तसेच येणाऱ्या-जाणाऱ्या नागरिकांना त्रास देणे, अशा प्रकारांमुळे महिला, लहान मुले, ज्येष्ठ नागरिक आणि सर्वसामान्य कुटुंबांच्या सुरक्षिततेचा प्रश्न निर्माण होत असल्याचे निवेदनात नमूद करण्यात आले आहे.

विशेषतः अनधिकृत दारू विक्रीवर केवळ कागदोपत्री कारवाई न करता राज्य उत्पादन शुल्क विभाग व पोलीस प्रशासनाने संयुक्तपणे प्रत्यक्ष पाहणी करून कठोर कायदेशीर कारवाई करावी, अशी मागणी नागरिकांनी केली आहे. तसेच ड्राय डेच्या दिवशीही अवैध दारू विक्री होत असल्याच्या तक्रारींची चौकशी करून दोषींवर कारवाई करण्याची मागणी करण्यात आली आहे.

दरम्यान, शासनाच्या नशामुक्ती व व्यसनमुक्ती अभियानाच्या पार्श्वभूमीवर अवैध दारू विक्रीलाही आळा घालणे आवश्यक आहे, असे निवेदनात नमूद करण्यात आले आहे. तरुण पिढीला व्यसनापासून दूर ठेवण्यासाठी अमली पदार्थांविरोधात कारवाईसोबतच अवैध दारू विक्रीवरही प्रभावी नियंत्रण आवश्यक असल्याचे नागरिकांनी म्हटले आहे.

हिंद नगर व भवानी नगर परिसरातील नागरिकांना सुरक्षित आणि शांततापूर्ण वातावरण मिळावे, यासाठी प्रशासनाने तातडीने प्रत्यक्ष पाहणी करून अवैध दारू विक्री बंद करावी. तसेच या परिसरात नवीन दारू दुकानास परवानगी देऊ नये किंवा विद्यमान दुकानाचे स्थलांतर करू नये, अशी ठाम मागणी निवेदनाद्वारे करण्यात आली आहे.

या मागणीची दखल घेऊन प्रशासनाने तातडीने कार्यवाही न केल्यास नागरिकांना लोकशाही मार्गाने आंदोलन अथवा उपोषणाचा मार्ग स्वीकारावा लागू शकतो, असा इशाराही निवेदनातून देण्यात आला आहे.

अहिल्यानगर-पाथर्डी मार्गावर भरधाव ट्रॅव्हल्स रस्त्यावर उलटली. २० प्रवासी थोडक्यात बचावले

आष्टी (प्रतिनिधी) : पुण्याहून नांदेडकडे निघालेली खासगी ट्रॅव्हल्स अहिल्यानगर-पाथर्डी मार्गावर अचानक तांत्रिक बिघाड झाल्याने रस्त्यावर पलटी झाल्याची घटना घडली. हा भीषण अपघात आष्टी तालुक्यातील मराठवाडी येथील हॉटेल सम्राटसमोर पहाटे ३:२५ वाजण्याच्या सुमारास घडला. सुदैवाने या अपघातात कोणतीही जीवितहानी झाली नसून, गाडीतील सर्व २० प्रवासी किरकोळ जखमी झाले आहेत.

गाढ झोपेत असतानाच उलटली बस
'स्वामी टूर्स ॲन्ड ट्रॅव्हल्स'ची बस (क्रमांक ए.आर. ०६, बी. ६७००) पुण्यावरून अहिल्यानगर-पाथर्डी मार्गे नांदेडच्या दिशेने २० प्रवाशांना घेऊन जात होती. पहाटेच्या वेळी बहुतांश प्रवासी गाढ झोपेत असताना आष्टी तालुक्यातील मराठवाडी शिवारात ट्रॅव्हल्समध्ये अचानक तांत्रिक बिघाड झाला आणि चालकाचे वाहनावरील नियंत्रण सुटल्याने बस थेट रस्त्यावर उलटली. अचानक झालेल्या या अपघातामुळे प्रवाशांमध्ये मोठी घबराट उडाली; मात्र नशीब बलवत्तर असल्याने सर्व प्रवासी मोठ्या अनर्थातून बचावले. जखमी प्रवाशांना उपचारासाठी तातडीने अहिल्यानगर येथील रुग्णालयात दाखल करण्यात आले आहे.

अंभोरा पोलिसांकडून अवघ्या ३० मिनिटांत मदतकार्य
पहाटे ३:२५ च्या सुमारास अपघाताची माहिती मिळताच अंभोरा पोलीस ठाण्याचे सहायक पोलीस निरीक्षक विक्रांत हिंगे यांच्या मार्गदर्शनाखाली पोलीस पथकाने तत्परता दाखवली. पोलीस अंमलदार शिवदास केदार, अमोल शिरसाठ, कृष्णा नरवडे, प्रकाश पडवळ, सोपान येवले आणि होमगार्ड धुमाळ यांनी अवघ्या ३० मिनिटांत घटनास्थळी धाव घेतली. पोलिसांनी स्थानिक नागरिकांच्या मदतीने बचावकार्य राबवून सर्व जखमी प्रवाशांना खासगी रुग्णवाहिकेद्वारे उपचारासाठी अहिल्यानगर येथे हलवले.

चालकाला मारहाण करून कार पळवणारे दोन भामटे गजाआड; 'डायल ११२' मुळे अवघ्या १०५ मिनिटांत कारवाई.

बीड (प्रतिनिधी) मूळचे कोळगाव (ता. गेवराई) येथील रहिवासी व सध्या शांतीनिकेतन शाळेजवळ राहणारे अशोक दत्तात्रय करांडे (वय ४२) हे १९ सप्टेंबर रोजी मध्यरात्री दोनच्या सुमारास घरासमोर मित्राची कार (एमएच २३ एडी १४२४) घेऊन थांबले होते. त्यावेळी आलेल्या दोन भामट्यांनी "आम्हाला तुझी गाडी दे" अशी दमदाटी करत करांडे यांना कारमधून बाहेर ओढून मारहाण केली आणि गाडी घेऊन पसार झाले.

घटनेनंतर करांडे यांनी तात्काळ 'डायल ११२' वर संपर्क साधला. माहिती मिळताच शिवाजीनगर पोलिस पथकाने शहरात नाकाबंदी करून पाठलाग सुरू केला आणि रात्री ३:४५ वाजता अंबिका चौक परिसरातून पळवून नेलेली कार जप्त केली. या प्रकरणात सुधीर हनुमान वाघमारे (वय २५) व प्रीतम गणेश हनवते (वय १९, दोघे रा. शाहूनगर, बीड) यांना अटक करून गुन्हा नोंदवण्यात आला आहे. ही कारवाई पोलिस निरीक्षक शीतलकुमार बल्लाळ, अंमलदार भास्कर केंद्र, संतोष राऊत व सचिन आगलावे यांनी केली.

‘डायल ११२’ ची तत्परता ठरली गेमचेंजर
नागरिकांच्या सुरक्षेसाठी कार्यरत असणाऱ्या 'डायल ११२' प्रणालीवर कॉल प्राप्त होताच शिवाजीनगर पोलिस पथकाने दाखवलेले प्रसंगावधान व अवघ्या १०५ मिनिटांत आरोपींना बेड्या ठोकून केलेली यशस्वी कामगिरी वाखाणण्याजोगी आहे.

शाहूनगर परिसरातील दोन भामट्यांना अटक

अटक करण्यात आलेले सुधीर वाघमारे आणि प्रीतम हनवते हे दोघेही शहरातील शाहूनगर भागातील रहिवासी असून, मध्यरात्री रस्त्यावर दादागिरी करत वाहन हिसकावून घेण्याचा त्यांचा प्रयत्न पोलिसांनी त्वरित उधळून लावला आहे.

हालगे गल्ली ३३ वर्षांची परंपरा!मिरवणुकी ऐवजी नवचैतन्य गणेश मंडळाचा भव्य महाप्रसाद.

*आज ज्ञानेश्वर महाराज उखळीकर यांचे कीर्तन; उद्या हजारो भाविकांना महाप्रसाद

परळी वैजनाथ | (प्रतिनिधी)  परळी शहरातील हालगे गल्ली येथील नवचैतन्य गणेश मंडळाच्या वतीने गेल्या ३३ वर्षांपासून गणेशोत्सवात मिरवणूक न काढता विविध सामाजिक व धार्मिक उपक्रम राबविण्याची परंपरा यंदाही कायम ठेवण्यात आली आहे. यानिमित्त गुरुवार, दि. २४ सप्टेंबर रोजी सायंकाळी ७ ते १० वाजेपर्यंत भागवताचार्य श्री ह.भ.प. ज्ञानेश्वर महाराज उखळीकर यांचे भव्य कीर्तन आयोजित करण्यात आले आहे.

श्रीधाम वृंदावन गौरक्षक सेना व सनातन रक्षक सेना फाउंडेशनचे मराठवाडा प्रदेशाध्यक्ष असलेले ज्ञानेश्वर महाराज उखळीकर यांच्या कीर्तनाचा लाभ भाविकांना घेता येणार आहे.

दरवर्षीप्रमाणे यंदाही शुक्रवार, दि. २५ सप्टेंबर रोजी भव्य-दिव्य महाप्रसादाचे आयोजन करण्यात आले आहे. दुपारी १ ते सायंकाळी ५ वाजेपर्यंत महाप्रसादाचे वितरण करण्यात येणार असून, दरवर्षी या महाप्रसादाचा सुमारे दहा हजार भाविक लाभ घेतात.

गणेशोत्सवात अनावश्यक खर्च व मिरवणुकीऐवजी गेल्या ३३ वर्षांपासून धार्मिक आणि सामाजिक उपक्रमांना प्राधान्य देणाऱ्या नवचैतन्य गणेश मंडळाच्या या उपक्रमाचे परिसरासह पंचक्रोशीत कौतुक होत आहे. विशेष म्हणजे हालगे गल्लीतील सर्व युवक एकत्र येऊन हा उपक्रम उत्साहाने राबवितात.

कीर्तन व महाप्रसादाचा हजारो भाविकांनी लाभ घ्यावा, असे आवाहन नवचैतन्य गणेश मंडळ, हालगे गल्ली यांच्या वतीने करण्यात आले आहे.

जमात-ए-इस्लामी हिंद परळीच्या वतीने MBBS साठी निवड झालेल्या विद्यार्थ्यां चा भव्य सत्कार.

 *डॉक्टर बनून करणार मानवतेची सेवा" – GMC मध्ये निवड झाल्यावर परळीच्या गुणवंत विद्यार्थ्यांचा संकल्प

परळी वैजनाथ (प्रतिनिधी) : सर्वसामान्य पार्श्वभूमी असलेल्या परळी शहरातील दोन गुणवंत विद्यार्थ्यांनी NEET परीक्षेत घवघवीत यश संपादन करत शासकीय वैद्यकीय महाविद्यालयांमध्ये (GMC) आपले स्थान पक्के केले आहे.

विद्यार्थी शेख मोहम्मद झैद मोईन अहमद याला GMC नागपूर आणि सय्यद हुझैफा सय्यद जावेद याला GMC नाशिक येथे MBBS अभ्यासक्रमासाठी प्रवेश मिळाला आहे. या गौरवपूर्ण ऐतिहासिक यशाबद्दल जमात-ए-इस्लामी हिंद (JIH), परळी यांच्या वतीने एका विशेष सन्मान सोहळ्याचे आयोजन करून दोन्ही विद्यार्थ्यांचा भव्य सत्कार करण्यात आला.या गरिमापूर्ण सोहळ्यात दोन्ही भावी डॉक्टरांना शाल आणि फुलांचा हार घालून सन्मानित करण्यात आले. 

या भावुक प्रसंगी दोन्ही विद्यार्थ्यांनी समाजासमोर एक आदर्श वस्तुपाठ ठेवला. त्यांनी उपस्थित जनसमुदायासमोर संकल्प करत वचन दिले की –

"आम्ही भविष्यात एक डॉक्टर म्हणून पूर्ण निष्ठा आणि प्रामाणिकपणे समाजातील गरीब व गरजू लोकांवर उपचार करून मानवतेची सेवा करू."

सोहळ्याला संबोधित करताना जमातचे ज्येष्ठ पदाधिकारी सय्यद अन्वर सर यांनी दोन्ही विद्यार्थ्यांचे अभिनंदन केले आणि त्यांना भविष्यासाठी अत्यंत मोलाचे मार्गदर्शन केले. ते म्हणाले की, "विद्यार्थ्यांनी नेहमी आपल्या मुख्य ध्येयावर लक्ष केंद्रित (फोकस) ठेवावे. आता एक डॉक्टर म्हणून त्यांच्यावर जी मोठी जबाबदारी आली आहे, ती पूर्ण निष्ठेने पार पाडावी. जनकल्याण आणि समाजाची सेवा करणे हेच एका डॉक्टरचे परम कर्तव्य आहे."

जमात-ए-इस्लामी हिंद, परळीचे अध्यक्ष सय्यद इफ्तेखार सर यांनीही दोन्ही विद्यार्थ्यांच्या उज्ज्वल भविष्यासाठी शुभेच्छा दिल्या आणि म्हणाले की, जर इरादे पक्के असतील तर मर्यादित साधनांमध्येही मोठे यश मिळवता येते, हे या मुलांनी सिद्ध करून दाखवले आहे.या प्रसंगी जमात-ए-इस्लामी हिंदचे सर्व सन्माननीय अरकान (सदस्य) आणि शहरातील प्रतिष्ठित नागरिक मोठ्या संख्येने उपस्थित होते. सर्वांनी विद्यार्थ्यांच्या पालकांचे त्याग आणि मुलांच्या कठोर परिश्रमाचे कौतुक केले. हे यश संपूर्ण परळी शहरासाठी एक मोठी प्रेरणा आहे

शिवनाम जपातून शरीरशुद्धी; शांततेसाठी सामूहिक प्रयत्न करा. मुला-मुलींना संस्कारांची शिदोरी द्या लिंगपूजा भस्म धारणेची शिकवण द्या.:- सिद्धचैतन्य शिवाचार्य महाराज.

*परळीत संत श्री गुरूलिंग स्वामींच्या १२५ व्या पुण्यतिथी महोत्सवाची उत्साहात सांगता*

परळी वैजनाथ (प्रतिनिधी) वैद्यनाथनगरी परळी येथे वीरशैव लिंगायत समाज परळी व श्री गुरूलिंग स्वामी देवस्थानच्या वतीने दि. १५ सप्टेंबर पासून सुरू असलेल्या संतश्रेष्ठ श्री गुरूलिंग स्वामी यांच्या १२५ व्या पुण्यतिथी महोत्सव व अखंड शिवनाम सप्ताहाची मंगळवार, दि. २२ सप्टेंबर रोजी उत्साहात सांगता झाली. यानिमित्त श्री गुरूलिंग स्वामी महाराजांच्या पालखीचा भव्य सोहळा काढण्यात आला. शिवनामाचा अखंड गजर, ‘ॐ नमः शिवाय’ गुरुराज माऊलीचा जयघोष, आणि ठिकठिकाणी भाविकांकडून पालखीवर करण्यात आलेली पुष्पवृष्टी यामुळे संपूर्ण परळी शहर भक्तिरसात न्हाऊन निघाले.

यावेळी सद्गुरू ष.ब्र.१०८ श्री सिद्धचैतन्य शिवाचार्य महाराज साखरखेर्डेकर यांनी उपस्थित भाविकांना आशीर्वचन देताना सामाजिक व सार्वजनिक शांततेसाठी सर्वांनी सामूहिक प्रयत्न करावेत तसेच शरीरशुद्धीसाठी शिवनामाचा जप करावा, असे आवाहन केले. सिद्ध चैतन्य महाराज म्हणाले की, वीरशैव लिंगायत समाज मोठा आहे. या समाजाच्या पुढील पिढीला चांगले संस्कार देणे ही प्रत्येकाची जबाबदारी आहे. समाजातील मुला-मुलींना लहानपणापासून लिंगपूजा, भस्मधारणेसह आपल्या धार्मिक परंपरा आणि संस्कारांची शिकवण दिली पाहिजे. संस्कारक्षम पिढी घडली तरच समाजाची प्रगती अधिक भक्कमपणे होईल. प्रत्येक धार्मिक व सामाजिक कार्यक्रमात महिला मोठ्या उत्साहाने सहभागी होत असतात. हीच खरी स्त्रीशक्ती आहे. महिलांप्रमाणेच पुरुषांनीही हिरिरीने प्रत्येक कार्यक्रमात सहभागी होऊन समाजापुढे आदर्श निर्माण करावा, असे आवाहनही सिद्धचैतन्य शिवाचार्य महाराज यांनी केले.

परळी ही ज्योतिर्लिंग प्रभू श्री वैद्यनाथाची पावन नगरी आहे. श्रावण मासानिमित्त येथे प्रभू वैद्यनाथाच्या दर्शनासोबतच शिवाचार्यांचे अनुष्ठान होत असते. अशा पवित्र नगरीत शिवाचार्यांचे दर्शन व आशीर्वाद घेण्याचे भाग्य लाभणे ही मोठी गोष्ट आहे, असे सांगत महाराजांनी परळीच्या धार्मिक महत्त्वावर प्रकाश टाकला. मनुष्य जीवन अनमोल आहे. प्रत्येकाने शिवनामाचा जप करावा, भक्तीच्या मार्गाने चालावे; तरच जीवनाचे सार्थक होईल, असा संदेशही त्यांनी दिला.

*शिवनामाच्या गजरात पालखी सोहळा*

मंगळवारी सकाळी ९ वाजता श्री वैद्यनाथ मंदिर येथून संतश्रेष्ठ श्री गुरूलिंग स्वामी महाराजांच्या पालखी सोहळ्याला प्रारंभ झाला. वैद्यनाथ मंदिर, देशमुखपार, अंबेवेस, गणेशपार, नांदूरवेस, गोपनपाळे गल्ली, आंबेवेस, भोई गल्ली मार्गे पालखी बेलवाडी येथे पोहोचली. पालखी मार्गावर जागोजागी भाविकांनी श्रींचे दर्शन घेतले आणि पालखीवर पुष्पवृष्टी केली. ‘ॐ नमः शिवाय’, ‘मन्मथस्वामी महाराज की जय’ आणि ‘गुरूलिंग स्वामी महाराज की जय’ अशा जयघोषाने शहरातील वातावरण भक्तिमय झाले होते.

*सात दिवस अखंड शिवनामाचा गजर*

मागील सात दिवसांपासून बेलवाडी मंदिर परिसरात अखंड शिवनाम सप्ताहासह विविध धार्मिक कार्यक्रमांचे आयोजन करण्यात आले होते. पारायण प्रमुख म्हणून श्री दयानंद चौधरी होते. दररोज आरती, शिवनाम जप, धार्मिक प्रवचन आणि महाप्रसादाचा कार्यक्रम सुरू होता. मंगळवारी पालखी बेलवाडी येथे पोहोचल्यानंतर प्रवचन, आरती व महाप्रसादाने महोत्सवाची सांगता झाली. या पालखी सोहळ्यात वीरशैव लिंगायत समाजातील महिला-पुरुषांसह शहरातील शिवभक्त व भाविक मोठ्या संख्येने सहभागी झाले. पालखी सोहळ्यामुळे परळी शहरातील प्रमुख मार्गांवर भक्तिमय आणि उत्साहाचे वातावरण निर्माण झाले होते.

कार्यक्रमाच्या यशस्वीतेसाठी गुरूलिंग स्वामी देवस्थानचे अध्यक्ष दत्ताप्पा ईटके गुरूजी, सचिव अॅड. गिरीषअप्पा चौधरी, प्रा. रामलिंगप्पा काटकर, सोमनाथअप्पा हालगे, विजयकुमार मेनकुदळे, शिवकुमारअप्पा व्यवहारे, शंकरअप्पा उदरगीरकर, शिवशंकरअप्पा निर्मळे, अक्षय मेनकुदळे, अॅड. मंदार नरवणे, सौ. मीरा धनंजय कोरे, चंद्रकांतअप्पा उदगीरकर यांच्यासह समस्त वीरशैव लिंगायत समाजबांधव व भगिनींनी परिश्रम घेतले.

लालपरी' प्रवाशांचा जीव टांगणीला! हेड लाइट बंद, बॅटरीच्या उजेडात बस २० किलोमीटर धावली.

आष्टी (प्रतिनिधी) आष्टी ते सावरगाव अशी धावणारी बस शुक्रवारी रात्री सात वाजेनंतर चक्क बॅटरीच्या उजेडात २० किलोमीटर धावली. रात्रीच्या अंधारात धोकादायक रीतीने हा प्रवास करण्यात आला. प्रवाशांनीही जीव मुठीत धरूनच सावरगावपर्यंत प्रवास केला. या प्रकारामुळे आष्टी आगाराच्या बसेस आणि कार्यक्षमता यावर प्रश्नचिन्ह उभे राहिले आहे.

याबाबतची प्रवाशांकडून मिळालेली माहिती अशी की, सावरगावला मुक्कामी निघालेली एसटी बस (एमएच २० बीएल २०५५) कडा येथून सायंकाळी ६ वाजता निघाली. साबलखेड, धानोरा, पिंपरखेड, हिवरा मार्गे बस सुलेमान देवळा येथे पोहोचली. तेथे अंधार पडल्याने चालकाने बसचे मुख्य हेडलाइट लावले मात्र तांत्रिक बिघाडामुळे बसचे लाइट न लागल्याने काही वेळ बस तिथेच थांबली. या परिस्थितीत भर रस्त्यात अंधारात बस उभी ठेवण्याऐवजी चालकाने बसमध्ये असलेल्या बॅटरीवर गाडी पुढे नेण्याची तयारी केली. काही प्रवाशांनीही नेहमीचाच रस्ता आहे, असे सांगत बॅटरीच्या उजेडात बस नेण्यास संमती दर्शविली. 

वाहकाने धरली बॅटरी
त्यानंतर वाहकाने चालकाच्या शेजारी उभे राहात रस्त्याच्या दिशेने प्रकाश जाईल, अशा पद्धतीने बॅटरी धरली. बस चालविताना चालकाची कसरत झाली. चालकाने नेहमीच्या वेगापेक्षा कमी वेग ठेवत म्हसोबाची वाडी, गहूखेल, तागडखेल, वेलतुरी आणि गंगादेवी मार्गे साडेसात वाजता सावरगाव येथे बस पोहोचविली. दहा प्रवाशांनी गावी पोहोचल्यावर सुटकेचा निश्वास टाकला.

नियमित तपासणी नाही का?

दरम्यान, या प्रकारामुळे रात्रीच्या वेळी धावणाऱ्या बसेसच्या दिव्यांची तपासणी केली जात नाही का, असा सवाल उपस्थित होत आहे. यापुढे नादुरुस्त गाड्या मुक्कामी न पाठवता सुस्थितीतील बस द्याव्यात, अशी मागणी कडा येथील सामाजिक कार्यकर्ते अमोल साळवे यांनी केली आहे.

माहिती घेतो...
बस बॅटरीच्या उजेडात चालल्यासंदर्भात चालक आणि संबंधित कर्मचाऱ्यांकडे चौकशी करून योग्य ती माहिती घेतो.
- अनिल निकाळजे, आगार प्रमुख, आष्टी

English

हिंदी सारांश

Web Title : Headlights off, 'Lalpari' runs 20 km on battery light; passengers terrified!

Web Summary : An ST bus ran 20 km in darkness using only battery light after its headlights failed. Passengers held their breath during the dangerous journey from Ashti to Savargaon. This incident raises serious questions about the maintenance and operational efficiency of the Ashti depot's buses.