बीड (प्रतिनिधी) जिल्ह्यातून जाणाऱ्या राष्ट्रीय महामार्गाच्या कामात मोठ्या प्रमाणावर भ्रष्टाचार आणि बोगस काम झाल्याच्या तक्रारींनंतर आता थेट दिल्लीचे केंद्रीय पथक बीड जिल्ह्यात दाखल झाले आहे.
केंद्रीय समितीकडून जिल्ह्यातील नवनिर्मित सिमेंट रस्त्यांची अत्यंत कडक आणि तांत्रिक तपासणी सुरू करण्यात आली असून, यामुळे निकृष्ट दर्जाचे काम करणाऱ्या कंत्राटदारांचे आणि त्यांना पाठीशी घालणाऱ्या अधिकाऱ्यांचे धाबे दणाणले आहेत.
महामार्गाचे काम पूर्ण झाल्यानंतर काही महिन्यांतच रस्त्यांची दुरवस्था झाल्याने आणि कामाच्या दर्जाबाबत नागरिकांमधून तीव्र संताप व्यक्त होत होता. या प्रकरणी वरिष्ठ पातळीवर झालेल्या तक्रारींची गंभीर दखल घेत, राष्ट्रीय महामार्ग प्राधिकरणाच्या केंद्रीय गुणवत्ता नियंत्रण पथकाने बीड गाठले आहे.
या तपासणीदरम्यान पथकाकडून अत्याधुनिक यंत्राच्या साहाय्याने सिमेंट रस्त्यांचे ठिकठिकाणचे गोलाकार भाग कापून बाहेर काढले जात आहेत. रस्ता खोदून काढलेले हे सॅम्पल्स थेट प्रयोगशाळेत तपासणीसाठी पाठवले जाणार आहेत.
फौजदारी गुन्हे दाखल होणार का?
तपासणीमुळे बोगस काम करणाऱ्यांची मोठी कोंडी झाली आहे. या सखोल चौकशीचा अहवाल थेट केंद्रीय मंत्रालयाला सादर केला जाणार असून, दोषी कंत्राटदार आणि अधिकाऱ्यांवर ब्लॅकलिस्ट (काळ्या यादीत टाकणे) कारवाई होणार का व फौजदारी गुन्हे दाखल होणार का? याकडे आता संपूर्ण बीड जिल्ह्याचे लक्ष लागले आहे.
No comments:
Post a Comment