ग्राहक बनून दुकानात शिरलेल्या बुरखाधारी महिलांची हातचलाखी.सराफा दुकानातून सोन्याच्या दागिन्यांचा अख्खा बॉक्सच पळवला.

केज (प्रतिनिधी):बीड जिल्ह्यातील केज शहरातील गजबजलेल्या सराफा लाईन परिसरात एक अत्यंत धक्कादायक आणि भन्नाट हातचालाखीची चोरीची घटना समोर आली आहे. ग्राहक बनून दुकानात शिरलेल्या तीन अज्ञात बुरखाधारी महिलांनी ६ लाख रुपये किमतीचे सोन्याचे ४ गंठण असलेला संपूर्ण बॉक्स सुवर्णकाराची नजर चुकवून अत्यंत शिताफीने लंपास केला. १ जुलै रोजी घडलेला हा संपूर्ण प्रकार दुकानातील सीसीटीव्ही कॅमेऱ्याच्या फुटेजमुळे तब्बल २० दिवसांनंतर उघडकीस आला असून, याप्रकरणी केज पोलीस ठाण्यात तीन बुरखाधारी महिलांविरुद्ध अधिकृत गुन्हा दाखल करण्यात आला आहे.

१ जुलैची घटना; ५ लाख ९९ हजारांचे ४७ ग्रॅम सोने पळवले
पोलीस सूत्रांनी दिलेल्या माहितीनुसार, केज येथील उमरी रोडवर राहणारे सुवर्णकार प्रदीप विजयकुमार रुद्रवार यांचे सराफा लाईनमध्ये दुकान आहे. १ जुलै २०२६ रोजी दुपारी दीड ते तीन वाजेच्या सुमारास तीन बुरखाधारी महिला सोने खरेदीच्या बहाण्याने दुकानात आल्या. त्यांनी वेगवेगळे दागिने पाहण्याचा बनाव केला. याच दरम्यान सुवर्णकाराची नजर चुकवून त्यांनी दुकानातील काउंटरवर ठेवलेला ४७ ग्रॅम वजनाच्या ४ सोन्याच्या गंठणचा बॉक्स चोरून नेला. आजच्या प्रति ग्रॅम १२ हजार ७६५ रुपये दराने या चोरी झालेल्या दागिन्यांची एकूण किंमत ५ लाख ९९ हजार ९५५ रुपये आहे.

स्टॉक मोजताना ४ गंठण कमी भरले
ही चोरी इतक्या शिताफीने करण्यात आली होती की घटनेच्या वेळी दुकानदाराच्या ही गोष्ट अजिबात लक्षात आली नाही. १५ जुलै रोजी दुकानातील शिल्लक राहिलेल्या दागिन्यांच्या नियमित स्टॉकचे मोजमाप करत असताना ४ सोन्याचे गंठण कमी भरल्याचे निदर्शनास आले. त्यामुळे दुकानदाराने संशय येऊन मागील सर्व दिवसांचे तारीखनिहाय सीसीटीव्ही (CCTV) फुटेज तपासण्यास सुरुवात केली. १ जुलैचे फुटेज पाहताना दुपारी आलेल्या तीन बुरखाधारी महिलांनी तो सोन्याचा बॉक्स हळूच उचलून आपल्याजवळ लपवल्याचे स्पष्ट दिसले.

२० दिवसांच्या विलंबानंतर केज पोलिसांत गुन्हा नोंद
या चोरीबाबत बोलताना फिर्यादी सुवर्णकार प्रदीप रुद्रवार यांनी बोलताना सांगितले की, "चोरी १ जुलै रोजी झाली असली तरी १५ जुलैला स्टॉक मोजताना दागिने कमी आढळले. त्यानंतर सीसीटीव्ही फुटेज पडताळणी करण्यात आणि तांत्रिक माहिती गोळा करण्यात वेळ गेल्याने फिर्याद देण्यास २० दिवसांचा उशीर झाला." सुवर्णकाराच्या फिर्यादीवरून केज पोलिसांनी मंगळवारी, २१ जुलै रोजी रात्री ८:०० वाजता तीन अज्ञात बुरखाधारी महिलांविरुद्ध भारतीय न्याय संहितेच्या (BNS) संबंधित कलमांन्वये गुन्हा दाखल केला आहे. केज पोलीस ठाण्याचे पथक आता परिसरातील इतर दुकानांचे सीसीटीव्ही फुटेज आणि संशयित महिलांच्या हालचालींचा कसून तपास करत आहे.