महिलेच्या सततच्या मानसिक त्रासाला आणि ब्लॅकमेलिंगला वैतागून हॉटेल व्यावसायिकाची गळफास घेऊन आत्महत्या.

केज (प्रतिनिधी): एका डोकेदुखी ठरलेल्या महिलेच्या सततच्या मानसिक त्रासाला, फोनवरील शिवीगाळ आणि ब्लॅकमेलिंगला वैतागून बीड जिल्ह्यातील केज तालुक्यातील एका हॉटेल व्यावसायिकाने लातूरमध्ये गळफास घेऊन आपले जीवन संपवल्याची घटना समोर आली आहे. केज तालुक्यातील सोनीजवळा येथील रहिवासी असलेले प्रकाश नानासाहेब भांडवलकर (४१ वर्षे) असे मृताचे नाव आहे. याप्रकरणी मृत तरुणाच्या वडिलांच्या फिर्यादीवरून लातूरच्या एम.आय.डी.सी. पोलीस ठाण्यात गुन्हा दाखल करण्यात आला असून, घटनेच्या अवघ्या काही तासांतच आरोपी महिलेला पोलिसांनी जेरबंद केले आहे.

आधीच केज पोलिसांत दाखल केला होता अर्ज
पोलीस सूत्रांनी दिलेल्या अधिकृत एफआयआर दस्तऐवजातील माहितीनुसार, मृत प्रकाश भांडवलकर हे लातूर शहरातील एम.आय.डी.सी. परिसरात हॉटेल व्यवसाय करत होते. त्यांची पत्नी नोकरीनिमित्त माजलगाव येथे राहत असल्याने प्रकाश हे लातूरमधील श्रीनगर भागात भाड्याच्या खोलीत एकटेच वास्तव्यास होते. हॉटेल व्यवसायाच्या निमित्ताने त्यांची ओळख रुपाली गरड उर्फ रुक्मिणी सुधीर अंधारे (रा. श्रीनगर, एम.आय.डी.सी., लातूर) या महिलेशी झाली होती. ओळख झाल्यानंतर सदर महिलेने प्रकाश यांच्या कौटुंबिक अडचणींचा फायदा घेत त्यांना व त्यांच्या कुटुंबीयांना फोनवरून सतत शिवीगाळ करणे, धमकी देणे व मानसिक त्रास देण्यास सुरुवात केली होती. या छळाला कंटाळून भांडवलकर कुटुंबाने १९ मे २०२६ रोजी केज पोलीस ठाण्यात यापूर्वीच तक्रार अर्ज दाखल केला होता.

"पप्पू शेठ गेलाय, लातूरला या!"; कुटुंबावर कोसळला दुःखाचा डोंगर
त्यानंतरही आरोपी महिलेचा त्रास सुरूच राहिला. रविवारी, १९ जुलै २०२६ रोजी सकाळी १०:०४ वाजेच्या सुमारास आरोपी महिला रुपाली अंधारे हिने थेट प्रकाश यांच्या ६५ वर्षीय वृद्ध वडिलांना फोन केला आणि "पप्पू शेठ गेला आहे, तुम्ही तात्काळ लातूरला या," असे थंडपणे सांगून फोन कट केला. ही बातमी ऐकताच भांडवलकर कुटुंबीयांच्या पायाखालची जमीन सरकली. त्यांनी तातडीने गाडी करून लातूर गाठले. श्रीनगर भागातील खोलीत पोहोचले असता प्रकाश हे जमिनीवर मृतावस्थेत आढळले. उपस्थितांच्या आणि पोलिसांच्या मदतीने मृतदेह ताब्यात घेऊन उत्तरीय तपासणीसाठी शासकीय रुग्णालयात पाठवण्यात आला.

आरोपी महिला रुपाली अंधारे अखेर पोलिसांच्या जाळ्यात
आपला ४१ वर्षांचा तरुण मुलगा गमावल्यानंतर सोनीजवळा येथील ६५ वर्षीय वृद्ध पिता नानासाहेब मनोहर भांडवलकर यांच्या अश्रूंचा बांध फुटला होता. त्यांनी दिलेल्या तक्रारीवरून लातूरच्या एम.आय.डी.सी. पोलीस ठाण्यात आरोपी महिला रुपाली गरड उर्फ रुक्मिणी सुधीर अंधारे हिच्याविरुद्ध भारतीय न्याय संहितेच्या (BNS) गंभीर कलमांन्वये गुन्हा नोंदवण्यात आला. एमआयडीसी पोलीस ठाण्याचे पोलीस निरीक्षक समाधान चौरे यांच्या मार्गदर्शनाखाली तपास करणारे पोलीस उपनिरीक्षक (PSI) अजय पाटील यांनी 'लोकमत'शी बोलताना माहिती दिली की, "आत्महत्यूस प्रवृत्त करणाऱ्या आरोपी महिला रुपाली अंधारे हिला पोलिसांनी शोध घेऊन तात्काळ अटक केली असून, तिची पोलीस कोठडीत चौकशी सुरू आहे."