तहसीलदार राकेश गिड्डे मृत्यू प्रकरणात घातपाताची शंका मागे, नातेवाइकांच्या निर्णयामुळे चर्चा.

केज (प्रतिनिधी) : येथील तत्कालीन तहसीलदार राकेश गिड्डे यांच्या अपघाती निधनाचा तपास लातूरच्या स्थानिक गुन्हे शाखेने पूर्ण केला आहे. सुरुवातीला या प्रकरणावर गंभीर शंका उपस्थित करणाऱ्या गिड्डे यांच्या नातेवाइकांनी आता 'हा घातपात नसून अपघातच आहे' असा यू-टर्न घेतल्याने केज तालुक्यात व महसूल वर्तुळात उलटसुलट चर्चेला उधाण आले आहे.

विभागीय आयुक्त आणि जिल्हाधिकाऱ्यांच्या आदेशावरून हा तपास लातूर एलसीबीकडे वर्ग करण्यात आला होता. सुरुवातीला तहसीलदार राकेश गिड्डे यांच्या पत्नी, भाऊ आणि वडील यांनी महसूल खात्यातीलच काही कर्मचाऱ्यांवर संशय व्यक्त करत घातपाताची शंका उपस्थित केली होती. मात्र, लातूरचे पोलिस अधीक्षक अमोल तांबे यांना जून महिन्यात गिड्डे यांच्या सर्व नातेवाइकांनी स्वाक्षरी करून एक निवेदन दिले. ‘तपासाच्या रेकॉर्डवरील सीसीटीव्ही फुटेज आणि इतर सर्व पुरावे पाहिल्यानंतर हा घातपात नसून अपघातच असल्याची आमची खात्री पटली आहे. आता आमचा कोणावरही संशय नाही,’ अशी माहिती राकेश गिड्डे यांचे बंधू अक्षय गिड्डे व लातूर एलसीबीचे पोलिस निरीक्षक सुधाकर भावकर यांनी दिली.

मोबाइलच्या 'सीडीआर'वरून २८ जणांचे जबाब.
तपासादरम्यान तहसीलदार राकेश गिड्डे यांच्या मोबाइलच्या सीडीआरवरून (कॉल डिटेल रेकॉर्ड) अनेक बाबी तपासण्यात आल्या. अपघातापूर्वीच्या दोन दिवसांत त्यांच्या संपर्कात आलेल्या २८ हून अधिक अधिकारी आणि कर्मचाऱ्यांचे जबाब लातूर स्थानिक गुन्हे शाखेने नोंदवले असल्याची माहिती पोलिस उपनिरीक्षक राजेश घाडगे यांनी दिली.

कारमधील टॅब, मोबाइल आणि लॅपटॉप गायब; तपास सुरू

अपघातानंतर तहसीलदार गिड्डे यांच्या कारमधील मोबाइल, टॅब आणि लॅपटॉप गायब झाले असून त्यांचा तपास अजूनही लागलेला नाही. अपघात स्थळाशेजारीच नेहरूनगर तांडा असून, तेथील काही नागरिकांनी हे साहित्य घेतले असण्याची शक्यता पोलिसांनी वर्तवली आहे. लॅपटॉपमध्ये अद्याप सिमकार्ड टाकण्यात आलेले नाही; ते टाकले जाताच त्याचा माग काढता येईल, त्यामुळे हा तपास सध्या गुलदस्त्यात आहे.

डाव्या बाजूच्या सातही बरगड्या तुटल्या होत्या
राकेश गिड्डे यांच्या पार्थिवाचे शवविच्छेदन (पोस्टमार्टम) करणारे रेणापूरचे वैद्यकीय अधिकारी डॉ. राहुल हाडबे यांनी सांगितले की, अपघातामध्ये गिड्डे यांच्या पूर्ण डाव्या बाजूला गंभीर मार लागला होता. त्यांच्या डाव्या बाजूच्या सातही बरगड्या तुटल्या होत्या, तर डाव्या बाजूचा कानही तुटला होता. डोक्याला गंभीर दुखापत झाल्याने नाक आणि कानातून मोठा रक्तस्त्राव झाला होता. या अपघाताचा अंतिम विसेरा अहवाल लातूर एलसीबीकडे प्राप्त होणार असल्याचेही त्यांनी स्पष्ट केले.