केज (प्रतिनिधी): स्वस्तात दुबई येथील सोन्याचे बिस्कीट खरेदी करण्याचा मोह एका सराफाला चांगलाच महाग पडला आहे. बाजारभावापेक्षा कमी दरात सोने देण्याचे आमिष दाखवून गेवराई तालुक्यातील टाकळगव्हाण येथील सराफ दत्ता काकडे यांना केज येथे बोलावून घेण्यात आले आणि त्यांच्याकडील ३ लाख रुपये लुटण्यात आले. मात्र, पैसे लुटून पळून जात असताना चोरांची दुचाकी एका कारला धडकल्याने झालेल्या अपघातात दोघे जण गंभीर जखमी झाले. पोलिसांनी या दोन्ही जखमी आरोपींना जेरबंद केले असून त्यांचे इतर ३ ते ४ साथीदार फरार आहेत.
असा रचला लुटीचा 'ट्रॅप'
धाराशिव जिल्ह्यातील एका भामट्याने सराफ दत्ता काकडे यांना सोशल मीडियावर फ्रेंड रिक्वेस्ट पाठवून ओळख वाढवली होती. त्याने "आम्ही दुबईहून टॅक्स चुकवून सोन्याची बिस्किटे आणली आहेत, ती तुम्हाला स्वस्तात देतो," असे आमिष दाखवले. यावर विश्वास ठेवून रविवारी (१७ मे) दुपारी दत्ता काकडे आणि त्यांचा कारागीर सतीश दीक्षित हे त्यांच्या 'किया' कारमधून (MH 23 BN 8387) ३ लाख रुपये घेऊन केजमधील उमरी फाट्याजवळ आले. तिथे आधीच दबा धरून बसलेले आरोपी आप्पा शिवाजी शिंदे आणि विशाल रामकिसन शिंदे यांनी त्यांना गंगा माऊली कारखान्या जवळील एका शाळेच्या भिंतीच्या आडोशाला नेले. तिथे जाताच चोरांनी कारागीर सतीश दीक्षित यांच्या हातातील ३ लाख रुपयांची पिशवी हिसकावून घेतली आणि सराफाच्या पाठीत लोखंडी रॉडने मारहाण करून दुचाकीवरून पळ काढला.
पळताना अपघात, पोलिसांकडून धरपकड
चोरटे पैशांची पिशवी घेऊन भरधाव वेगाने केजकडे पळून जात होते. गोळा झालेल्या जमावाने त्यांना अडवण्याचा प्रयत्न केला असता, नियंत्रण सुटून चोरांची दुचाकी समोरून येणाऱ्या एका कारवर (MH 05 AJ 8312) जोरात आदळली. या भीषण अपघातात आप्पा शिवाजी शिंदे आणि विशाल रामकिसन शिंदे (दोघे रा. मांडवा, ता. कळंब, जि. धाराशिव) हे गंभीर जखमी झाले.
घटनेची माहिती मिळताच सपोनि संदीप मांजरमे आणि पोलीस उपनिरीक्षक उमेश निकम यांच्या पथकाने घटनास्थळी धाव घेत दोन्ही आरोपींना ताब्यात घेतले. त्यांची झाडाझडती घेतली असता त्यांच्याकडे धारदार चाकू आणि केबल वायरचा बंच मिळून आला. त्यांच्यावर उपजिल्हा रुग्णालयात उपचार सुरू आहेत. सराफ दत्ता काकडे यांच्या फिर्यादीवरून केज पोलीस ठाण्यात गुन्हा दाखल करण्यात आला असून पोलीस निरीक्षक स्वप्नील उनवणे यांच्या मार्गदर्शनाखाली पुढील तपास सुरू आहे.
No comments:
Post a Comment