अंबाजोगाई (प्रतिनिधी) सध्या उन्हाळी सुट्यांमुळे अंबाजोगाई बस स्थानकावर प्रवाशांची गर्दी मोठ्या प्रमाणावर होत आहे बसस्थानकावरील याच प्रवाशांच्या गर्दीचा फायदा घेऊन अज्ञात चोरट्याने महिलेच्या बॅगेतील ४ लाख ७० हजार रुपये किमतीचे सोन्याचे दागिने आणि रोख रक्कम लंपास केली आहे. याप्रकरणी सदर महिलेच्या तक्रारीवरून अंबाजोगाई शहर पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
याबाबत सविस्तर माहिती अशी की, परळी वैजनाथ येथील रहिवासी मनिषा विनोद जगतकर (वय ५०) या बुधवारी सकाळी आपल्या वडिलांच्या पुण्यतिथीच्या कार्यक्रमासाठी मुरुड (जि. लातूर) येथे जाण्यास निघाल्या होत्या. त्या परळीहून अंबाजोगाई बस स्थानकावर आल्या होत्या. येथून पुढे जाण्यासाठी सकाळी नऊ वाजण्याच्या सुमारास अंबाजोगाई येथून मुरुड जाणाऱ्या बसमध्ये बसल्या.
या घटनेनंतर मनिषा जगतकर यांनी अंबाजोगाई शहर पोलीस ठाण्यात धाव घेऊन दागिने चोरीची तक्रार नोंदवली. दरम्यान पोलीस निरीक्षक शरद जोगदंड यांच्या मार्गदर्शनाखाली सहाय्यक पोलीस निरीक्षक आनंद शिंदे या प्रकरणाचा पुढील तपास करत आहेत.
बसमध्ये मोठी गर्दी असल्यामुळे जागा पकडण्यासाठी त्यांचे दीर आप्पाराव कांबळे यांनी दागिन्यांची बॅग कंडक्टरच्या सीटजवळ ठेवली होती. याच वेळी बसमध्ये उभ्या असलेल्या एका अनोळखी व्यक्तीने 'तुम्हाला बसता येत नाही, मी ही बॅग उचलून वर ठेवतो' असे म्हणत मदतीचा बहाणा केला. बॅग वर ठेवल्यानंतर तो व्यक्ती आपल्याला दुसरी गाडी लागली आहे असे सांगून आपल्या दोन साथीदारांसह बसमधून खाली उतरून गेला.
मनिषा जगतकर जेव्हा मुरुड येथील आपल्या माहेरी पोहोचल्या, तेव्हा त्यांना बॅगेचा आतील कप्पा कशाने तरी कापलेला आढळला. त्यातून सोन्याचे गंठण, लॉकेट, अंगठ्या, बोरमाळ, बांगड्या, कर्णफुले आणि १० हजार रुपये रोख असा एकूण ४ लाख ७० हजार रुपयांचा मुद्देमाल चोरीला गेल्याचे लक्षात आले.
No comments:
Post a Comment