परभणीच्या रस्त्यांचे भाग्य उजळणार खड्डेमय रस्त्यांपासून होणार सुटका.

परभणी (प्रतिनिधी): परभणी शहरातील रस्त्यांची अत्यंत दुरवस्था झालेली आहे. त्यामुळे रस्त्यांवरून वाहने चालविणेही कठीण झाले आहे. मात्र, परभणीकरांचे हे कठीण दिवस संपण्याची आशा निर्माण झाली असून रस्त्यांचे भाग्य उजळण्याची शक्यता आहे. परभणीच्या रस्ते कामांसाठी गुजरातच्या कंपनीला कंत्राट मिळाले आहे. महिनाभरात कामे सुरू होण्याची आशा आहे.

फेब्रुवारी २०२२ मध्ये महानगरपालिकेने सार्वजनिक बांधकाम विभागाकडे हस्तांतरित केलेल्या शहरातील ६० कोटीच्या रस्ते बांधकामाची निविदा प्रक्रिया ऑगस्ट २०२३ मध्ये पूर्ण झाली आहे. शासनाकडे निविदा स्विकृती व कार्यरंभ आदेश प्रलंबित आहेत. गुजरात राज्यातील सृजन इंन्फ्रॉकॉन या कंपनीची निविदा मंजूर झाल्यामुळे शासनाकडून त्यास मंजुरी मिळण्याची शक्यता आहे.

राज्यात महाविकास आघाडीचे शासन असताना महानगरपालिकेने शहरातील व ग्रामीण भागांंना जोडणारे रस्ते सार्वजनिक बांधकाम विभागाकडे घ्यावीत व त्या रस्त्यांचे नूतनीकरण करावे, अशी मागणी तत्कालीन सार्वजनिक बांधकाम मंत्री अशोक चव्हाण यांच्याकडे केली होती. ही मागणी तात्काळ मान्य होऊन शहरातील प्रमुख रस्त्यांचे सार्वजनिक बांधकाम विभागाकडे हस्तांतरण करण्यात आले होते व त्यास मान्यता देखील मिळाली होती. शहर व ग्रामीण भागांना जोडणाऱ्या रस्त्यांसाठी ८० कोटींचा निधी देखील मंजूर करण्यात आल्याचे सांगण्यात आले होते. फेब्रुवारी २०२२ मध्ये या सर्व रस्ते कामांचे उद्घाटन चव्हाण यांच्या हस्ते ठिकठिकाणी करण्यात आले होते. परंतु, त्यानंतर मात्र जून २०२२ मध्ये सत्तांतर झाले. शासनाने सर्व विभागांची कामे व निधी रोखला.

रस्त्यासाठी आंदोलने

शहरातील हे प्रमुख रस्ते असून या रस्त्यांवर प्रचंड राबता असतो. परंतु, त्याची अत्यंत दुरवस्था झालेली आहे. तीनही ऋतूत नागरिकांना विविध समस्यांना सामोरे जावे लागत आहे. खड्डेमय रस्ते, त्यामध्ये साचलेले गटारांचे पाणी, धुळ, दगडगोट्यांमुळे नागरीक त्रस्त झालेले आहे. त्यामुळे या रस्त्यांसाठी शहरात वेगवेगळ्या ठिकाणी नागरीकांनी, लोकसेवकांनी लक्षवेधक आंदोलने देखील केली आहेत. परंतु, रस्यांचा प्रश्न अद्यापही मार्गी लागलेला नाही.

नांदेड येथील सार्वजनिक बांधकाम मंडळाच्या अधीक्षक अभियंत्यांनी शहरातील या रस्तेकामांसाठी निविदा प्रक्रिया राबवली होती. किती वेळेस राबवली हा मुद्दा गौण आहे, परंतु अंतिमतः निविदाधारक एजन्सीच्या निविदेला मात्र मंजुरी मिळालेली आहे. ता. २९ ऑगस्ट २०२३ रोजी या संदर्भात अहमदाबाद (गुजरात) येथील सृजन इंन्फ्राकॉन प्रा. लिमीटेड या कंपनीला पत्र दिले आहे.

त्यामध्ये महापालिका हद्दीतील जिल्हा सामान्य रुग्णालय ते राष्ट्रीय महामार्ग ६१ पर्यंत व परभणी-जांब, आळंद, भोगाव रस्ता, अनुसया टॉकीज ते रेल्वे क्रॉसिंग पर्यंत, जायकवाडी कॅनॉल ते खंडोबा रस्ता, राष्ट्रीय महामार्ग ६१ ते गायकवाड मळा, जुना पेडगाव रोड, महाराणा प्रताप चौक ते धाररोड, मरीआई मंदिर ते कारेगा रोड, कब्रस्थान ते अक्षदा मंगल कार्यालय या एकून १३ ते १४ किलोमीटर रस्त्यांचे मजबुतीकरणासह डांबरी नूतनीकरण कऱणे, या रस्त्यांवर दुभाजकासह चार पदरी सीसी पेकर शोल्डर नाली, युटिलीटी, पथदिवे व वृक्षारोपणासह सुधारणा कराव्यात असे या पत्रात नमूद केले आहे. या कामाच्या देयकाची तसेच बँक गॅरटींच्या स्वरुपात भरणा केलेल्या बीड सेक्युरीटीचा विधीग्राह्यता कालावधीत पुढे किमान सहा महिन्यासाठी म्हणजे ता. २८ फेब्रुवारी २०२४ पर्यंत वाढ करावी, असेही या पत्रात म्हटले आहे.

महानगरपालिका अंतर्गत कामे मंजूर असून कामाची निविदा स्विकृती मंत्रालय स्तरावर आहे. सार्वजनिक बांधकाम मंडळाने अहमदाबाद येथील सृजन इंन्फ्राकॉन या कंपनीची निविदा मंजूर केली असून त्या निविदेला स्विकृती व कार्यारंभ आदेश मिळाल्यानंतर कामांना सुरुवात केली जाईल.

— बालाजी शिंदे, उपविभागीय अभियंता, सा.बां.वि. परभणी.