कोंबडीचे पाय का तोडले म्हणून धारदार शस्त्राने वार; मटण शॉपमधील घटना.

*मटण दुकानात दोघांत झालेल्या वादात एकाने दुसऱ्याच्या डोक्यात धारधार शस्त्र मारले. या घटनेची पोलिसांकडे नोंद झाली नसली तरी संपूर्ण गावात आणि तालुक्यात एकच चर्चा सुरू झाली आहे.

केज (प्रतिनिधी) : किरकोळ कारणावरून वाद होण्याच्या घटना वाढत आहेत. नेमक्या कोणत्या कारणावरून कोणात कसा वाद होईल आणि त्यातून मारहाण आणि खून झाल्याच्या घटना समोर आल्या आहेत. बीड जिल्ह्यात अशी एक घटना घडली असून किरकोळ कारणावरून चक्क धारधार शस्त्र डोक्यातच मारून युवकाला गंभीर जखमी करण्यात आले. ज्या कारणामुळे ही घटना घडली ती वाचून तुम्हाला देखील हसू येईल.

जिल्ह्यातील केज तालुक्यातील साळेगाव येथे दोन युवक (दिगंबर राऊत आणि अशोक राऊत) मटण शॉपवर मटण घेण्यासाठी आले होते. दिगंबर आणि अशोक जेव्हा मटण दुकानात पोहोचले तेव्हा दुकानात कोणी नव्हेत. अशोक याने स्वत:हून दुकानातील कोंबडीचे पाय कापण्यास सुरूवात केली. हा प्रकार पाहून दिगंबरने त्याला जाब विचारण्यास सुरुवात केली. थोड्याच वेळात या दोघांमध्ये वाद आणि वादाचे रुपांतर हाणामारीत झाले. हाणामारीत अशोकने चक्क दिगंबरच्या डोक्यात मटण कापण्यासाठीचे धारधार शस्त्र मारले. या हल्ल्यात दिगंबर राऊत गंभीर जखमी झाला. 

हा सर्व प्रकार सुरू असताना आसपास उपस्थित असलेल्या नागरिकांनी दिगंबरला तात्काळ रुग्णालयात दाखल केले. दोघांमधील वाद हा भावकीतील असल्याने यावर कोणी बोलण्यास तयार नाही. या प्रकरणी पोलिसांत अद्याप गुन्हा दाखल करण्यात आलेला नाही. मात्र कोंबडीच्या पायावरून झालेल्या वादाची गावात आणि संपूर्ण तालुक्यात चर्चा सुरू आहे. वाद का झाला तर कोंबडीच्या पायामुळे झाला अशी चर्चा सुरू आहे. दरम्यान दिगंबर राऊत हा युवक गंभीर जखमी झाला असून त्याच्यावर प्राथमिक रुग्णालयात उपचार सुरू आहेत..