होळीच्या दिवशी बीड शहरावर शोककळा. रंग खेळायला जाणाऱ्या तरुणांच्या गाडीचा भीषण अपघात; एक ठार, तिघे गंभीर.

बीड (प्रतिनिधी): भीषण अपघाताच्या दुःखद घटनेने होळीच्या सणाच्या दिवशी बीड शहरावर शोककळा पसरली आहे. धुलिवंदन साजरा करण्यासाठी मित्रांसोबत रिसॉर्टवर जाण्याचे स्वप्न पाहणाऱ्या एका तरुणाचा प्रवासातच करुण अंत झाला. बीड-शिरूर रोडवरील नागऱ्याचीवाडी येथे सोमवार, 2 मार्च रोजी पहाटेच्या सुमारास भरधाव कारचा भीषण अपघात झाला. या अपघातात कृष्णा जालिंदर मुळे (वय- 22 वर्षे) हा तरुण जागीच ठार झाला असून, त्याचे तीन मित्र गंभीर जखमी झाले आहेत.

नेमकी घटना काय?

मिळालेल्या माहितीनुसार, बीड शहरातील रामतीर्थ परिसरातील काही तरुण धुलिवंदन साजरा करण्यासाठी परजिल्ह्यातील एका रिसॉर्टवर जाण्यासाठी निघाले होते. यासाठी 'व्हेरना' आणि 'थार' अशा दोन गाड्यांमधून हा मित्रपरिवार बीडहून शिरूर कासारमार्गे जात होता. पहाटेच्या वेळी रस्ते मोकळे असल्याने गाड्यांचा वेग जास्त होता. नागऱ्याचीवाडी परिसरात पोहोचताच व्हेरना कारवरील चालकाचे नियंत्रण सुटले. नियंत्रण सुटलेली ही कार रस्त्यावरून तीन-चार वेळा पलटी झाली आणि शेतातील एका विहिरीच्या कठड्याला जाऊन जोरदार धडकली.

विहिरीच्या कठड्यामुळे वाचले प्राण, पण...

अपघात इतका भीषण होता, की कारचा अक्षरशः चक्काचूर झाला. सुदैवाने, कार विहिरीच्या कठड्याला धडकून थांबली; अन्यथा ती थेट विहिरीत कोसळली असती आणि मोठा अनर्थ घडला असता. मात्र, या धडकेत गाडीतील कृष्णा मुळे याला गंभीर दुखापत झाल्याने त्याचा जागीच मृत्यू झाला.

मित्रांची मृत्यूशी झुंज

या अपघातात प्रसाद खोले, यश पेंढारे आणि अन्य एक मित्र असे तिघेजण गंभीर जखमी झाले आहेत. त्यांच्या पाठीमागून 'थार' गाडीत येत असलेल्या इतर मित्रांनी तात्काळ गाडी थांबवून जखमींना बाहेर काढले. जखमींपैकी प्रसाद खोले याची प्रकृती अत्यंत चिंताजनक असल्याने त्याला पुढील उपचारासाठी तातडीने छत्रपती संभाजीनगर येथील रुग्णालयात हलवण्यात आले आहे. तर यश पेंढारे व इतर जखमींवर बीडमधील खाजगी रुग्णालयात उपचार सुरू आहेत.

परिसरात शोककळा

अवघ्या 22 वर्षांच्या कृष्णा मुळे याचा अपघाती मृत्यू झाल्याने रामतीर्थ परिसरात आणि बीड शहरात हळहळ व्यक्त केली जात आहे. धुलिवंदनाच्या दिवशीच घराचा एकूलता एक तरुण गेल्याने मुळे कुटुंबावर दुःखाचा डोंगर कोसळला आहे. सणासुदीच्या काळात तरुणांनी वाहन चालवताना वेग मर्यादेचे पालन करावे, असे आवाहन प्रशासनाकडून वारंवार केले जात असतानाही अशा घटना घडत असल्याने चिंता व्यक्त होत आहे.