बीड (प्रतिनिधी) बीड जिल्हा कारागृहातील ढिसाळ कारभार, कैद्यांना मिळणारी व्हीआयपी वागणूक आणि गैरप्रकारांविरोधात खा. बजरंग सोनवणे यांनी थेट केंद्रीय गृहमंत्री अमित शाह यांची भेट घेऊन उच्चस्तरीय चौकशीची मागणी केली होती. या भेटीनंतर अवघ्या काही दिवसांतच कारागृह प्रशासनाला जाग आली असून, परिसरात गांजा, मोबाईल आणि इतर बेकायदेशीर वस्तूंच्या प्रवेशाला चाप लावण्यासाठी अत्याधुनिक 'हायटेक' तपासणी यंत्रणा बसवण्यात आली आहे.
बीड जिल्हा कारागृहात काही ठराविक कैद्यांना नियमांचे उल्लंघन करून विशेष सवलती दिल्या जात असल्याच्या गंभीर तक्रारी समोर आल्या होत्या. कारागृहात मोबाईलचा वापर, बंदी असलेल्या वस्तूंची सहज उपलब्धता आणि अधिकाऱ्यांची संशयास्पद भूमिका यांवरून खा. सोनवणे यांनी ३ ऑगस्ट रोजी दिल्लीत गृहमंत्री अमित शाह यांची भेट घेऊन निवेदन दिले होते. या प्रकरणी गृहमंत्र्यांनी तातडीने कारवाईचे आश्वासन दिले होते.
गृहमंत्र्यांकडे तक्रार झाल्यानंतर चक्रे वेगाने फिरली असून, बीड कारागृहात आता डिजिटल निगराणी आणि कडक सुरक्षेसाठी अत्याधुनिक साधने बसवण्यात आली आहेत. यात
बॅगेज स्कॅनर मशीन: कारागृहात येणाऱ्या प्रत्येक वस्तू आणि बॅगची बारकाईने तपासणी करण्यासाठी.
डोर फ्रेम मेटल डिटेक्टर: मुख्य प्रवेशद्वारावर संशयित धातू अथवा वस्तू शोधण्यासाठी. हँड हेल्ड मेटल डिटेक्टर: वैयक्तिक शारीरिक तपासणीसाठी असेल. कारागृहासारख्या संवेदनशील ठिकाणी होणाऱ्या गैरप्रकारांमुळे न्यायप्रणालीवरील सामान्य जनतेचा विश्वास ढळू नये, यासाठी स्वतंत्र प्राधिकरणाद्वारे चौकशीची मागणी अजूनही कायम आहे. मात्र, नव्या उपकरणांच्या आगमनामुळे आता बेकायदेशीर वस्तूंच्या थेट प्रवेशाला पूर्णपणे बंदी घालणे शक्य होणार आहे. गृह मंत्रालयाच्या हस्तक्षेपानंतर स्थानिक प्रशासनाने दाखवलेल्या या तत्परतेमुळे बीड कारागृहातील 'व्हीआयपी संस्कृती'ला ब्रेक लागण्याची शक्यता वर्तवली जात आहे.
No comments:
Post a Comment