परळीत दिव्य ज्योति जाग्रति संस्थानची गुरूपौर्णिमा उत्साहात साजरी.गुरू-शिष्य परंपरेतूनच विश्वकल्याणाचा मार्ग खुला होतो – सुश्री रुचिका भारतीजी_

सद्गुरूच जीवनाला योग्य दिशा देऊन आत्मकल्याणाचा महामंत्र देतात – स्वामी निरूपानंदजी_ 

परळी वैजनाथ (प्रतिनिधी)दिव्य ज्योति जाग्रति संस्थानच्या वतीने परमपूज्य श्री आशुतोष महाराजजी यांच्या कृपाशीर्वादाने आयोजित श्री गुरुपौर्णिमा महोत्सव शुक्रवार दिनांक 31 जुलै रोजी परळी वैजनाथ येथील वैष्णवी मंगल कार्यालयात अत्यंत भक्तिमय आणि उत्साहपूर्ण वातावरणात संपन्न झाला. मराठवाड्यासह विविध जिल्ह्यांतून आलेल्या हजारो भाविकांच्या उपस्थितीमुळे संपूर्ण परिसर गुरुभक्तीच्या जयघोषाने दुमदुमून गेला.

कार्यक्रमाची सुरुवात शिवसेना नेते अभयकुमार ठक्कर, सामाजिक कार्यकर्ते ॲड. मनोज संकाये, नगरपरिषदेचे गटनेते नितीन बागवाले, नगरसेवक अश्विन मोगरकर, शिवसेना युवा नेते प्राचार्य अतुल दुबे, उद्योजक वैजनाथआप्पा कोल्हे, अखिल भारतीय वारकरी मंडळाचे संस्थापक ह.भ.प. रामेश्वर महाराज कोकाटे, पत्रकार धनंजय आढाव, संतोष जुजगर, बालाजी ढगे आदी मान्यवरांच्या हस्ते दीपप्रज्वलन तसेच परमपूज्य सद्गुरु सर्वश्री आशुतोष महाराजजी यांच्या प्रतिमेची पूजा व महाआरती करून झाली. त्यानंतर सामूहिक भजनाने संपूर्ण वातावरण भक्तिरसात न्हाऊन निघाले. टाळ-मृदुंगाच्या निनादात आणि भक्तिगीतांच्या स्वरांत उपस्थित भाविक मंत्रमुग्ध झाले.

यानंतर दिल्ली येथील परमपूज्य सद्गुरु सर्वश्री आशुतोष महाराजजी यांच्या कृपापात्र शिष्या साध्वी सुश्री रुचिका भारतीजी यांनी प्रभावी अध्यात्मिक प्रवचनातून गुरूचे जीवनातील अनन्यसाधारण महत्त्व उलगडून सांगितले. वेद, उपनिषदे तसेच संत परंपरेतील उदाहरणांच्या माध्यमातून त्यांनी गुरू हा अज्ञानातून ज्ञानाकडे नेणारा दीपस्तंभ असल्याचे सांगितले.

त्या म्हणाल्या, "भारताची गुरू-शिष्य परंपरा ही जगासाठी आदर्श आहे. श्रद्धा, विश्वास, विनम्रता आणि सेवाभाव या गुणांनी युक्त शिष्यालाच गुरूकृपेचा लाभ मिळतो. गुरू-शिष्य परंपरेतूनच विश्वात्मक कल्याण साध्य होते."

श्रीराम आणि हनुमान यांच्या आदर्श नात्याचा दाखला देत त्यांनी गुरूसेवेचे महत्त्व स्पष्ट केले. जीवनातील संकटांच्या काळात सद्गुरूच योग्य मार्ग दाखवतात. गुरू शिष्याची परीक्षा घेत असतात आणि त्या प्रत्येक प्रसंगात विश्वास व समर्पण कायम ठेवणारा शिष्यच अध्यात्मिक प्रगती साधू शकतो, असेही त्यांनी सांगितले.

यावेळी परमपूज्य सद्गुरु सर्वश्री आशुतोष महाराजजी यांचे कृपापात्र शिष्य स्वामी निरूपानंदजी यांनीही मार्गदर्शन केले. आजच्या स्पर्धात्मक आणि धावपळीच्या जीवनात मानव दिशाहीन होत चालला असून, अशा परिस्थितीत सद्गुरूच योग्य मार्ग दाखवून आत्मकल्याणाचा महामंत्र देतात, असे त्यांनी सांगितले. गुरूंच्या शिकवणीचा स्वीकार करून जीवनात अध्यात्मिक मूल्यांची जोपासना करणे हीच खरी गुरुदक्षिणा असल्याचे त्यांनी नमूद केले.

कार्यक्रमस्थळी आकर्षक फुलांची सजावट, रांगोळी, प्रकाशयोजना आणि परमपूज्य सर्वश्री आशुतोषजी महाराजजी यांच्या भव्य दर्शनमंदिराने उपस्थितांचे विशेष लक्ष वेधून घेतले. सत्संग परिसरात अध्यात्मिक साहित्याचे स्टॉलही उभारण्यात आले होते.

परळीसह अंबाजोगाई, लातूर, नांदेड, गंगाखेड, सोनपेठ, माजलगाव, केज, कळंब, सिरसाळा आदी भागांतून मोठ्या संख्येने भाविकांनी उपस्थित राहून गुरुकृपेचा लाभ घेतला.

कार्यक्रमाच्या यशस्वी आयोजनासाठी दिव्य ज्योति जाग्रति संस्थानच्या परळी शाखेतील सर्व स्वयंसेवकांनी अथक परिश्रम घेतले. कार्यक्रमाच्या समारोपानंतर उपस्थित भाविकांना महाप्रसादाचे वितरण करण्यात आले.

*फोटो कॅप्शन :*

परळी वैजनाथ येथे आयोजित दिव्य ज्योती जागृती संस्थानच्या श्री गुरुपौर्णिमा महोत्सवात मार्गदर्शन करताना सुश्री रुचिका भारतीजी, स्वामी निरूपानंदजी. प्रारंभी मान्यवरांच्या हस्ते दीपप्रज्वलन व महाआरती करण्यात आली.