जालन्यात आज मनोज जरांगेची तोफ धडाडणार; जालना-बीड रस्ते वाहतुकीत मोठे बदल, पर्यायी मार्ग कोणते?वाचा.

छत्रपती संभाजीनगर (प्रतिनिधी) : मनोज जरांगे यांची आज, शनिवारी (१४ ऑक्टोबर) जालन्यातील आंतरवाली सराटी येथे सभा होणार आहे. या सभेला होणारी गर्दी लक्षात घेता पोलिस अधीक्षकांनी जालना, बीडकडे जाणाऱ्या व येणाऱ्या वाहतुकीच्या मार्गात बदल केले आहेत.

आंतरवाली सराटी येथील रामगव्हाण रोडवर ही सभा होत आहे. सभास्थळ धुळे-सोलापूर राष्ट्रीय महामार्गाजवळ आहे. या महामार्गावरून जड वाहनांची वाहतूक मोठ्या प्रमाणात होते. त्यामुळे वाहतूककोंडी होऊन वाहनचालक, नागरिकांची गैरसोय होऊ नये, म्हणून वाहतुकीच्या मार्गात बदल करण्यात आल्याचे पोलिसांनी सांगितले.

शुक्रवारी रात्री दहा वाजल्यापासून ते शनिवारी (१४ ऑक्टोबर) रात्री १२ वाजेपर्यंत या मार्गावरील सर्व प्रकारच्या जड वाहनांची वाहतूक बंद ठेवण्याचे आदेश पोलिस अधीक्षक मनीष कलवानिया यांनी दिले आहेत. सर्व वाहनधारकांनी पर्यायी मार्गांचा वापर करावा. नियमांचे पालन करावे, असे आवाहन पोलिसांनी केले आहे. 

वाहतुकीसाठी पर्यायी मार्ग

- छत्रपती संभाजीनगर-पाचोड-शहागडमार्गे बीडकडे जाणारी वाहने छत्रपती संभाजीनगर, बिडकीन, पैठण, मुंगी, बोधेगाव, पारगाव, पाडळसिंगीमार्गे बीडकडे जातील. छत्रपती संभाजीनगर, कचनेर कमान, बिडकीन, पैठण, मुंगी, बोधेगाव, पारगाव, पाडळसिंगीमार्गे बीडकडे जातील. छत्रपती संभाजीनगर, पाचोड, डोणगाव फाटा, विहामांडवा, पैठण, मुंगी, बोधेगाव, पारगाव, पाडळसिंगीमार्गे बीडकडे जाता येईल.

- बीड, पाचोडमार्गे छत्रपती संभाजीनगरकडे येणारी वाहतूक बीड, पाडळसिंगी फाटा, पारगाव, बोधेगाव, पैठण, बिडकीनमार्गे छत्रपती संभाजीनगरकडे येईल.
- छत्रपती संभाजीनगर ते बीडकडे जालनामार्गे जाणारी वाहतूक छत्रपती संभाजीनगर, बदनापूर, जालना, घनसावंगीमार्गे बीडकडे जाईल.