40 वर्षीय इसमाचा दगडाने ठेचून खून. एका महिलेसह एका पुरूषाला ताब्यात.

बीड (प्रतिनिधी)बीड मध्ये एका 40 वर्षीय तरूणाचा दगडाने ठेचून खून झाल्याची घटना शहरातील मोंढा रोडवरील स्मशानभूमीच्या जवळ असलेल्या रस्त्यावर आज सकाळी उघडकीस आली. घटनेची माहिती कळताच शहर पोलीसांनी धाव घेवून पंचनामा केला. या प्रकरणात एका महिलेसह एका पुरूषाला ताब्यात घेतल्याचे सुत्रांनी सांगितल.

बीड शहरातील सय्यद मझहर सय्यद अखतर वय 40 वर्ष, रा. मोहम्मदीया कॉलनी, बीड ह.मु. तांदळवाडी ता. बीड या तरूणाचा मृतदेह आज सकाळी ११ वाजण्याच्या सुमारास मोंढा रोडवरील स्मशानभूमी जवळील रस्त्यावर आढळुन आला. त्या ठिकाणी एक स्कुटी देखील पडलेली होती. जवळच सय्यद मझहर याचा मृतदेह डोके छिन्न-विछिन्न अवस्थेत दिसुन आला. सदरील मृतदेह पोलीसांनी जिल्हा रूग्णालयात शवविच्छेदनासाठी पाठवला असुन या प्रकरणी पोलिसांनी तातडीने या प्रकरणाचा छडा लावण्याच्या उद्देशाने एका महिलेसह एका पुरूषाला ताब्यात घेतल्याचे सुत्रांनी सांगितले. खूनाचे कारण मात्र अद्याप समजू शकले नाही.