बीड (प्रतिनिधी) खाकी वर्दीचं स्वप्न उराशी बाळगून आलेल्या एका तरुणाचा पोलीस भरतीदरम्यान मृत्यू झाल्याची अत्यंत दुर्दैवी घटना बीडमध्ये घडली आहे. मैदानी चाचणीत धावताना अचानक चक्कर येऊन कोसळलेल्या या तरुणाचा मृत्यू झाला. या घटनेमुळे परिसरात शोककळा पसरली असून भरतीला आलेले तरुण हळहळ व्यक्त करत आहेत.
बीड येथे सध्या पोलीस भरतीची प्रक्रिया सुरू आहे. आज मैदानी शारीरिक चाचणी सुरू असताना, १६०० मीटर धावण्याच्या फेरीत दीपक भास्कर वावळ हा तरुण सहभागी झाला होता. धावत असताना अचानक त्याला अस्वस्थ वाटू लागले, यावेळी तो अचानक चक्कर येऊन थेट मैदानावरच कोसळला.
प्रशासनाकडून तातडीने हालचाली
मैदानावर उपस्थित असलेल्या पोलीस अधिकाऱ्यांनी आणि वैद्यकीय पथकाने क्षणाचाही विलंब न लावता दीपकला बीड येथील शासकीय रुग्णालयात दाखल केले. मात्र, रुग्णालयात पोहोचण्यापूर्वीच त्याची प्रकृती खालावली होती. वैद्यकीय तपासणीनंतर डॉक्टरांनी त्याला मृत घोषित केले.
मृत दीपक वावळ हा परळी तालुक्यातील रहिवासी असल्याची प्राथमिक माहिती समोर आली आहे. आपल्या घरातील तरुण पोलीस होऊन येईल, अशी आशा असलेल्या त्याच्या कुटुंबावर या घटनेमुळे आभाळ कोसळले आहे.
No comments:
Post a Comment