केज (प्रतिनीधी) केज तालुक्यातील बनसारोळा येथे सरकारी गायरान जमिनीवर पोलिसांनी छापा मारून 57 लाख 90 हजार रुपये किमतीची गांजाची 500 किलो झाडे जप्त करण्यात आली.सहाय्यक पोलीस अधीक्षक कमलेश मीना यांच्यासह युसुफवडगाव पोलिसांनी शुक्रवारी दुपारी 4 वाजण्याच्या सुमारास ही कारवाई केली.
बनसारोळा येथील शासकीय गायरान जमिनीत हा गैरप्रकार सुरु होता. या जमिनीत पारधी समाजाची लोकवस्ती आहे. या वस्तीलगत गांजाची लागवड करण्यात आल्याची खात्रीलायक माहिती पोलिसांना मिळाली.माहिती मिळताच सहाय्यक पोलीस अधीक्षक कमलेश मीना व युसुफवडगाव ठाण्याचे सहाय्यक पोलीस निरीक्षक मच्छिंद्रनाथ शेंडगे यांनी सहकाऱ्यांसह शुक्रवारी दुपारी चार वाजण्याच्या सुमारास छापा टाकला. यावेळी गायरान जमिनीत गांजाची झाडे लागवड केल्याचे पोलिसांच्या निदर्शनास आले. पोलीस कर्मचाऱ्यांनी दोन तासाहून अधिक वेळ परिश्रम घेऊन गांजाची झाडे उपटून काढली.
नायब तहसीलदार आशा वाघ व तलाठी श्रीमती वाघमारे यांच्या उपस्थितीत सदरील गांजाच्या झाडांचे जागेवरच वजन करण्यात आले. तेव्हा पोलिसांनी अंदाजे 57 लाख 90 हजार रुपयांचा 550 किलो गांजा ताब्यात घेतला. ही गांजाची झाडे
नेमकी कोणी लागवड केली? याचा पोलीसांकडून तपास करण्यात येत आहे.
ही कारवाई सहाय्यक पोलीस अधीक्षक कमलेश मीना, सहाय्यक पोलीस निरीक्षक मच्छिंद्रनाथ शेंडगे, पोलीस उपनिरीक्षक राहुल पतंगे, सहाय्यक पोलीस उपनिरीक्षक अशोक थोरात, दिनकर तोंडे, योगेश समुद्रे, गणेश राऊत, महादेव केदार, जीवन जाधव, सुधीर बामदळे, भगवान खेडकर, प्रेमीला गाडेकर यांच्या पथकाने कारवाई केली आहे. या प्रकरणी युसुफवडगाव पोलीस ठाण्यात अज्ञाताविरोधात गुन्हा रात्री उशीरा गुन्हा दाखल करण्यात आला आहे.
No comments:
Post a Comment