राज्यात सुगंधी तंबाखू विक्रीस बंदी असतानाही नगर शहरात मोठ्या प्रमाणावर सुगंधी तंबाखू व सुपारी पासून बनविलेला मावा तसेच पान मसाल्याच्या पुड्यांची विक्री सर्रासपणे केली जात असल्याचे निदर्शनास येत आहे. या अवैधरित्या पान मसाला व सुगंधी तंबाखू विक्रेत्यांवर शहर विभागाचे पोलिस उपअधीक्षक विशाल ढुमे यांनी पोलिस अधीक्षक मनोज पाटील व अप्पर पोलिस अधीक्षक सौरभ अग्रवाल यांच्या मार्गदर्शनाखाली कारवाईचा बडगा उगारला आहे.

मंगळवारी (दि.26) उपअधीक्षक ढुमे यांना माहिती मिळाली की राज चेंबर्स, कोठला परिसरात मोठ्या प्रमाणावर मावा तसेच पान मसाल्याची विक्री केली जात आहे. या माहितीवरुन उपअधीक्षक ढुमे व त्यांच्या पथकातील पोलिस नाईक गणेश चव्हाण, सचिन मिरपगार, सचिन जाधव, बाबा फसले आदींच्या पथकाने राज चेंबर्स समोर असलेल्या टपरीवर छापा टाकत शाहीद फारुक शेख (वय 21, रा.कोठला मैदान) यास ताब्यात घेतले. 

18 हजार रुपये किंमतीचा सुगंधी तंबाखू पासून तयार केलेला मावा 480 रुपये किंमतीच्या विमल पान मसाल्याच्या पुड्या, 210 रुपये किंमतीच्या हिरा पान मसाल्याच्या पुड्या तसेच पान मसाला व मावा विक्रीतून जमा झालेली 6 हजार 730 रुपयांची रोकड असा एकूण 24 हजार 880 रुपयांचा मुद्देमाल जप्त केला आहे. मावा विक्रेता शाहीद फारुक शेख याच्या विरोधात तोफखाना पोलिस ठाण्यात गुन्हा दाखल करण्यात आला आहे.